सिद्धबाबा कारागार चलान

विराटनगर, २० फागुन । सिद्धबाबा भनिने कृष्णबहादुर गिरी कारागार चलान भएका छन् । उनी आज अदालतमा हाजिर भएपछि जेल चलान भएका हुन् ।

सिद्धबाबा उच्च अदालत विराटनगरले र्पुपक्षका लागि थुनामा राख्ने ९ माघको फैसला अगावै वेपत्ता भएका थिए । उनलाई अदालतले ३५ दिनभित्र हाजिर हुन भनेपछि समय बित्न लाग्दा आज अदालत उपस्थित भएका थिए । अदालतमा हाजिर भएपछि उनी कारागार चलान भए ।
सिद्धबाबाले आफू उपचारका लागि गएको जवाफ दिएका थिए । उनको निगरानीका लागि राखिएको सुरक्षाकर्मीलाई छाडेर जोगवनी हुँदै वेपत्ता भएका थिए । उनी वेपत्ता भएकै दिन उच्च अदालत विराटनगरले जिल्ला अदालत सुनसरीको धरौटीमा रिहा गर्न गरेको फैसला उल्टाउँदै र्पुपक्षका लागि थुनामा राख्ने आदेश दिएको थियो ।

अनुयायीमाथि ४ कात्तिकमा सुनसरीको चतरास्थित आश्रममै बलात्कार गरेको अभियोग लगाइएको छ । दुई बालककी आमा ती महिलाले गिरीमाथि आरोप लगाएपछि उनी संकटमा परेका थिए । महिलाले गिरीमाथि गत पौष महिनामा किटानी जाहेरी दिएकी थिइन् ।
बलात्कारको अभियोग लागेका गिरीलाई धरौटीमा छाड्ने सुनसरी जिल्ला अदालतको फैसला उच्च अदालत विराटनगरले बदर गरिदिएको थियो। ९ माघमा मुख्य न्यायाधीश तीलप्रसाद श्रेष्ठ र प्रेमराज कार्कीको संयुक्त इजलासले जिल्ला अदालतको आदेश बदर गरी र्पुपक्षका लागि थुनामा राख्ने फैसला गर्यो ।

सिद्धबाबाले आफूलाई एक महिलाले नियोजित रुपमा फसाउन खोजेको दाबी गर्दै आएका छन् । उनले आफू ब्रम्हचारी भएको र महिलाप्रति उच्च सम्मान गर्ने बताएका छन् । तर, बलात्कारको आरोप लगाउने महिलाले सिद्धबाबाले आफूमाथि कात्तिक ४ गते आश्रममै बलात्कार गरेको आरोप लगाएर सजाय दिलाएरै छाड्ने बताएकी छिन् ।