सामूहिक बलात्कार प्रकरणः फरार अभियुक्तलाई पक्रन इन्टरपोलको सहयोग!

काठमाडौं, ३१ वैशाख । दरबारमार्ग सामूहिक बलात्कार प्रकरणको रायसहितको अनुसन्धान प्रतिवेदन काठमाडौं प्रहरी परिसरले जिल्ला सरकारी वकिल कार्यालय समक्ष पेश गरेको छ ।

सोमबार दिउँसो प्रतिवेदन बुझाइएको परिसरका डिएसपी मोहन थापाले बताए । प्रकरणका मुख्य अभियुक्त पीडित युवतीका प्रेमी भनिएका शैलेश कार्की यसअघि नै पक्राउ परिसकेका छन् भने अन्य ३ जना फरार छन् ।

घटनामा संलग्न विकास गौतम, रवि पौडेल र दिपक श्रेष्ठलाई फरार प्रतिवादी बनाएर मुद्दा बुझाइएको छ । उनीहरुको खोजीका लागि इन्टरपोलमा डिफ्यूजन नोटिस जारी गर्ने तयारी गरिएको छ ।

चारै जनाविरुद्ध संगठित अपराधविरुद्धको मुद्दा चलाइएको छ ।

यस्तो थियो घटना

दाङ घर भएकी पीडित युवतीको शैलेश कार्कीसँग फेसबुकमार्फत चिनजान भएको थियो । कुराकानी अघि बढ्दै जाँदा उनीहरुको चिनजान प्रेममा परिणत भयो ।

युवतीको बयान अनुसार सोही अनुरुप कार्कीले युवतीलाई दरबारमार्गको ल्याण्डमार्क होटलमा बोलाए । तर, होटलमा कार्की एक्लै थिएनन्, उनले अरु तीनवटा कोठा बुक गरेर आफ्ना तीन जना साथी राखेका थिए ।

युवकहरु मदिरामा मस्त भएका बेला राति आफूमाथि सामूहिक बलात्कार भएको युवतीको दाबी छ ।

घटनालाई मिलाउन महानगरीय प्रहरी वृत्त, दरबारमार्गका तत्कालिन प्रहरी अधिकारी नै अग्रसर भएपछि यो बलात्कार प्रकरण चर्चामा आएको थियो ।