सुदूरपश्चिम विश्वविद्यालयका प्राध्यापक आन्दोलनमा

काठमाडौं, १० पुस । सुदूरपश्चिम विश्वविद्यालयको केन्द्रीय क्याम्पसका प्राध्यापक आन्दोलनमा उत्रेका छन् । विश्वविद्यालय केन्द्रीय क्याम्पसका प्रमुख डा. भूपेन्द्र विष्टले एकलौटी रुपमा कर्मचारी भर्ना प्रक्रिया मिचिएको भन्दै प्राध्यापकहरुले आन्दोलन थालेका हुन् ।

प्राध्यापक संघले नियुक्ति खारेज नभएसम्म आन्दोलन जारी राख्ने जनाएको छ । संघले अवैधानिक नियुक्ति खारेज र प्रमुख डा. विष्टको राजीनामा समेत माग गरेको छ ।

प्रमुखको काम, कर्तव्य र अधिकारमा क्याम्पसका लागि आवश्यक पर्ने शिक्षक, कर्मचारीको दरबन्दी कार्यकारी परिषद्मा सिफारिश गर्ने व्यवस्था भए पनि विष्टले एकलौटीरुपमा नियुक्ति दिएपछि एक सातादेखि सुदूरपश्चिम विश्वविद्यालयमा तनाव भएको छ । विभिन्न विद्यार्थी संगठन आन्दोलनमा रहेका बेला प्राध्यापक संघले उक्त विषयलाई लिएर संघर्षका कार्यक्रम सार्वजनिक गरेको छ ।