७५३ जना मागेकोमा २४ हजारले दिए निवेदन

काठमाडौं । प्रत्येक स्थानीय तह अन्तर्गतको रोजगार सेवा केन्द्रमा चाहिने रोजगार संयोजक पदमा करीब २४ हजारले इच्छा व्यक्त गर्दै निवेदन दिएका छन् ।

माघ ४ गतेदेखि आवेदन खुल्ला गरिएको थियो । सातै प्रदेशमा गरी २३ हजार ९८६ जनाले रोजगार संयोजकमा रहन इच्छा व्यक्त गर्दै निवेदन दिएका छन् । श्रम, रोजगार तथा सामाजिक सुरक्षा मन्त्रालयका अनुसार ७५३ स्थानीय तहमा एकएक जना रहने गरी रोजगार संयोजकको लागि आवेदन मागेको हो ।

प्रदेश १ बाट ३ हजार ६६५, प्रदेश २ बाट ३ हजार ६७१, प्रदेश ३ बाट ४ हजार ९९४, गण्डकी प्रदेशबाट १ हजार ९५५, प्रदेश नं ५ बाट दुई हजार ३०१, कर्णाली प्रदेशबाट तीन हजार ३७८ र सुदूरपश्चिम प्रदेशबाट चार हजार चार जनाको आवेदन परेको मन्त्रालयले जनाएको छ ।

तोकिएको मापदण्डका आधारमा स्वचालित कम्युटर प्रणालीबाट रिक्त पदको तीन गुणा बराबरको आवेदकको प्रारम्भिक सूची तयार गरिनेछ । प्रारम्भिक छनोट सकिएसँगै कम्प्युटर सीप परीक्षाका लागि सूचना जारी गरिने बताइएको छ ।

रोजगार संयोजकले स्थानीय तहभित्र रहेका बेरोजगार व्यक्तिको तथ्यांक संलन तथा विश्लेषण गरी बेरोजगारको सूची अद्यावधिक गर्ने, सूचीकृत बेरोजगार व्यक्तिलाई परिचयपत्र प्रदान गर्नुपर्नेछ ।

रोजगारदाताबाट माग भए बमोजिम सूचीकृत बेरोजगार व्यक्तिलाई रोजगारीका लागि काममा जान सूचित गर्ने, बेरोजगारको ज्ञान, सीप, अनुभव, क्षमता र बजारको मागका आधारमा आवश्यक पर्ने सीप विकास तालीमको पहिचान गरी सम्बन्धित तालीम केन्द्रमा सिफारिस गर्नेछन् । बेरोजगार परिवारलाई प्रदान गर्ने निर्वाह भत्ता वितरण गर्ने र रोजगारसम्बन्धी सरोकारवालाई सहजीकरण गर्नेछन् ।