पूर्वयुवराज पारस शाहलाई कारवाही गर्ने सञ्चारमन्त्रीको चेतावनी !

सञ्चार तथा सूचना प्रविधिमन्त्री गोकुल बास्कोटाले राज्यले कानुन उल्लंघन गर्ने कसैलाई नछाड्ने बताएका छन् । मन्त्रिपरिषदको निर्णय सार्वजनिक गर्ने कार्यक्रममा ५ भदौमा सिंहदरबारमा आयोजित पत्रकार सम्मेलनमा बोल्दै युवराज पारसको विमानस्थलको गतिविधिलाई उदण्ड भन्दै कारबाहीको चेतावनी दिए ।

नागरिक भइसकेकाहरु नागरिकको ठाउँमा बस्नुपर्ने बताउँदै कानुन उल्लंघन गर्नेमाथि कारबाही हुने बताए । केही दिनअघि त्रिभुवन विमानस्थलमा पूर्व युवराज पारसले डिउटीमा खटिएका प्रहरीमाथि हातपात गरेका थिए । यसबारे सोधिएको प्रश्नमा उनले कानुन सबैका लागि समान हुने भन्दै उदण्डता देखाउनेमाथि कारबाही गर्ने बताए । उनले भने,‘युवराज सुवराज चिनिन्नँ !’ राज्यले सुरक्षा चुनौतीलाई दृष्टिगत गरी सुरक्षा दिएपनि कसैलाई छुट नदिने बताए ।

पूर्व युवराज पारस शाहप्रति संकेत गर्दै पहिलाको खानदानी हौं भन्नेलाई सुरक्षा दिएको बताए । राजतन्त्र कुनै हालतमा नफर्कने बताउँदै भने,‘भूपू मायालुको यादवमा तड्पनेहरु तड्पिइरहुन् ।’ राजतन्त्रका नाममा राजनीति गर्नेहरु लोप हुने चेतावनी दिए । देशमा गणतन्त्रको संस्थागत विकास भइसकेकाले कहिलेपनि नर्फकने ठोकुवा गरे ।