सभामुख कसलाई बनाउने भन्ने विषयमा नेकपाभित्र अन्योल

काठमाडौं। सभामुखको निर्वाचन प्रक्रिया शुक्रबारदेखि सुरु हुँदैछ। शुक्रबार बस्ने प्रतिनिधिसभाको बैठकले सभामुखको निर्वाचन प्रक्रिया सुरु गर्छ। तर अहिलेसम्म सत्तारुण् दलले सभामुखको उम्मेद्वार चयन गर्न सकेको छैन।

सभामुख बन्नुपर्ने अडान उपसभामुख शिवमाया तुम्बाहाम्फेले राख्नुभएको छ। तर, प्रधानमन्त्री एवं नेकपाका अध्यक्ष केपी शर्मा ओली संसदीय दलका उपनेता सुभाषचन्द्र नेम्वाङलाई बनाउनुपर्ने पक्षमा रहेका छन् भने अध्यक्ष प्रचण्ड अग्नि सापकोटालाई सभामुख बनाउनुपर्ने अडानमा रहेका छन्।
नेकपा स्थायी कमिटी र सचिवालय बैडकले सभामुखको उम्मदेवार चयन गर्ने जिम्मा अध्यक्षद्वयलाई दिएको छ। ‘सभामुखको उम्मेद्वार टुंगो लगाउने जिम्मा पार्टीले अध्यक्षद्वयलाई दिएको छ,’ नेकपा नेता देबेन्द्र पौडेलले भने, ‘अब उहाँहरुबीच छलफल भएर उम्मेद्वारको टुंगो लाग्छ।’

प्रतिनिधिसभाको बैठक शुरू हुनुअगावै तुम्बाहाम्फेले राजीनामा दिने भनिए पनि नेकपाले निर्णय नगर्दा उपसभामुख नेकपाको निर्णयको प्रतिपक्षमा रहेको बताइएको छ। पार्टीले सभामुख बनाउने निर्णय नगर्दासम्म उपसभामुखबाट राजीनामा नगर्ने अडानमा तुम्बाहाम्फे रहेको स्रोतले बतायो। तत्कालीन सभामुख कृष्णबहादुर महरालाई बलात्कार प्रयासको आरोप लागेपछि असोज १४ गतेयता सभामुख पद रिक्त छ।

सभामुख पद नेकपा आफैंले राख्न चाहेपछि उपसभामुख तुम्बाहाम्फेलाई राजीनामा गराउने तयारी गरेको छ। सभामुख र उपसभामुख फरक–फरक दलको हुनुपर्ने प्रावधान रहेको छ।