सडक सुरक्षा र सवारी दुर्घटना अनुसन्धान तथा रेखाचित्रण अनुशिक्षण तालिम समापन

काठमाडौँ ३० असार,
राष्ट्रिय प्रहरी प्रशिक्षण प्रतिष्ठान महाराजगंज तथा यातायात व्यवस्था विभागको तत्वावधानमा महानगरीय ट्राफिक प्रहरी महाशाखाद्धारा महानगरीय सशस्त्र प्रहरी गण महाराजगंजमा बिभिन्न मितिमा संचालन भएका सडक सुरक्षा सम्बन्धी तालिम र सवारी दुर्घटना अनुसन्धान तथा रेखाचित्रण अनुशिक्षण तालिम शुक्रबार आयोजित एक समारोहबिच योगम्वर पार्टी प्यालेस, रामशाहपथमा समापन भएको छ ।

समारोहमा प्रमुख अतिथी यातायात व्यवस्था बिभागका महानिर्देशक रुपनारायण भट्टराईले ट्राफिक प्रहरीका लागि आवश्यक सडक सुरक्षा सम्बन्धी सामग्री ७ सय थान फ्लोरोसेन्ट ज्याकेट र ७४ थान मेजरिङ टेप महानगरीय ट्राफिक प्रहरी महाशाखाका प्रमुख प्रहरी नायव महानिरीक्षक मिङमार लामालाई हस्तान्तरण गर्नुभयो । कार्यक्रममा महानिर्देशक भट्टराई र प्रहरी नायव महानिरीक्षक मिङमार लामाले प्रशिक्षार्थीहरुलाई संयुक्त रुपमा प्रमाणपत्र वितारण गर्नुभयो ।

सो अवसरमा भट्टराईले प्रशिक्षार्थीहरुमा तालिमबाट व्यवसायिक ज्ञान,सिप तथा क्षमता अभिवृद्धि भएको विश्वास व्यक्त गर्नुहुदैँ सिकेका व्यवसायिक सिपलाई कर्तव्यपालनाको सिलसिलामा व्यवहारमा उर्तानुपर्ने बताउनुभयो ।
सडक तथा सवारी व्यवस्थापन सहज, सरल र सुरक्षित बनाउनु दुवै संस्थाको दायित्व रहेको उल्लेख गर्नुहुदैँ उहाँले यातायात व्यवस्थापन बिभागबाट आगामी दिनमा थप प्रभावकारी कार्य गर्दै जाने उहाँको भनाइ छ ।
कार्यक्रममा महानगरीय ट्राफिक प्रहरी महाशाखाका प्रमुख प्रहरी नायव महनिरीक्षक मिङमार लामाले ट्राफिक प्रहरीलाई यातायात व्यवस्था विभागबाट प्राप्त सहयोगप्रति आभार प्रकट गर्नुहुदँै सडक सुरक्षा अभियानमा सहयोग मिलेको बताउनुभएको छ ।

कार्यक्रममा प्रहरी नायव उपरीक्षक दान बहादुर कार्कीले स्वागत मन्तव्य तथा तालिम सम्बन्धी प्रतिवेदन प्रस्तुत गर्नुभयो ।
विभिन्न २०७३ चैत २४ गते संचालित ३ कार्य दिनको सवारी दुर्घटना अनुसन्धान तथा रेखाचित्रण अनुशिक्षण तालिममा प्रहरी हवल्दार १४ र प्रहरी जवान ४४ गरी ५८ जना र २०७४ असार १८ गते संचालन भएको ३ कार्यदिनको सडक सुरक्षा सम्बन्धी तालिममा प्रहरी नायब निरीक्षक ८, प्रहरी सहायक निरीक्षक २२, प्रहरी हवल्दार १४ र प्रहरी जवान ६६ गरी ११० जना प्रशिक्षार्थीहरुको सहभागिता रहेको थियो ।