उद्घाटन खेलमा पाकिस्तानलाई ५-२ ले हराउँदै भारत विजयी

काठमाडौं। साफ महिला फुटबल च्याम्पियनशीप आजदेखि शुरु भएको छ। त्रिपुरेश्वरस्थित दशरथ रंगशालामा आज च्याम्पियनशीपको उद्घाटनपछि प्रतियोगिताका खेलहरु शुरु भएका हुन्।

दशरथ रंगशालामा आयोजित उद्घाटन समारोहमा उपप्रधानमन्त्री एवम् सहरी विकासमन्त्री प्रकाशमान सिंहले बल हस्तान्तरण गर्दै च्याम्पियनशीपको शुभारम्भ गरेका हुन्।

च्याम्पियनशीपको उद्घाटन खेलमा भारत र पाकिस्तानबीच प्रतिस्पर्धा भएकोमा पाकिस्तानलाई ५-२ गोल अन्तरले हराउँदै भारत विजयी भयो। पहिलो हाफमै ४ -१ गोलको अग्रता बनाएको भारत विरुद्ध खेलको दोस्रो हाफमा पाकिस्तानले थप एक गोल गरेपनि जित आफ्नो पक्षमा पार्न सकेन।

आजको जितसँगै भारतले तीन अंक जोडेको छ। नेपालले भोलि भुटान विरुद्ध खेल्दै साफ च्याम्पियनशीपको यात्रा शुरु गर्नेछ। च्याम्पियनशिपमा नेपालसहित सात सार्क सदस्य राष्ट्रहरुले सहभागिता जनाएका छन्।

दुई समुहमा विभाजन गरी खेलाइएको प्रतियोगिताको पहिलो समूहमा भारत र पाकिस्तानसँगै साविक विजेता बंगलादेश रहेको छ। यसैगरी अर्को समूहमा आयोजक नेपालसहित भुटान, माल्दिभ्स र श्रीलंका छन्।

प्रतियोगिताको फाइनल खेल कात्तिक १४ गते हुनेछ।