नेप्सेमा दोहोरो सुधार, अधिकांश कम्पनीको सेयर मूल्य बढ्यो

नेपाली सेयर बजारमा सोमबार लगानीकर्ताहरूको मनोबल उच्च देखिएको छ, जसका कारण नेप्से परिसूचकमा उल्लेख्य सुधार आएको छ । विगत केही समयदेखि उतारचढावपूर्ण रहेको बजारमा यस वृद्धिले पुँजी बजारका सरोकारवालाहरूमाझ नयाँ उत्साह र सकारात्मक तरङ्ग पैदा गरिदिएको छ ।

नेपाल स्टक एक्सचेन्ज (नेप्से) का अनुसार आज बजार ४१.७० अङ्कले बढेर २ हजार ७१९.२४ विन्दुमा पुगेको छ । साताको दोस्रो कारोबार दिन म्युचुअल फन्ड बाहेकका सबैजसो उपसूचकहरूमा हरियाली छाएको छ, जसमा उत्पादन तथा प्रशोधन समूह ३.२१ प्रतिशत तथा जलविद्युत् र अन्य समूह साढे २ प्रतिशतभन्दा बढीले उकालो लागेका छन् ।

आज बजारमा कुल ३४३ वटा कम्पनीका १ करोड २२ लाख कित्ता सेयर ५ अर्ब ५१ करोड रुपैयाँमा किनबेच भएको छ । कुल कम्पनीहरूमध्ये २३९ वटाको सेयर मूल्य बढ्दा एभरेस्ट कलरको सेयर मूल्य सर्वाधिक १५ प्रतिशतले बढेको छ भने आत्मनिर्भर लघुवित्त र कर्पोरेट डेभलपमेन्ट बैंकका लगानीकर्ताले करिब साढे ६ प्रतिशत गुमाएका छन् ।

 अर्थतन्त्रका अन्य सूचकहरूमा सुधार आउने अपेक्षामा लगानीकर्ताहरूले खरिद बढाउँदा बजार सकारात्मक दिशातिर मोडिएको हो ।