धरानमा मापदण्डविपरीत सञ्चालित ३५ औषधि पसलमा कारबाही

सुनसरीको धरानस्थित बीपी कोइराला स्वास्थ्य विज्ञान प्रतिष्ठान परिसरमा कानुनी मापदण्ड मिचेर सर्वसाधारणको स्वास्थ्यमा खेलबाड गरिरहेका ३५ वटा औषधि पसलहरूमाथि स्थानीय प्रशासनले कडा कानुनी कारबाही गर्दै सिलबन्दी गरिदिएको छ । बिरामीको संवेदनशीलतासँग जोडिएको औषधि व्यवसायलाई मर्यादित र पारदर्शी बनाउने उद्देश्यका साथ यो कदम चालिएको हो ।

इलाका प्रशासन कार्यालय धरान, औषधि व्यवस्था विभाग विराटनगर, इलाका प्रहरी कार्यालय र वडा कार्यालयका प्रतिनिधिहरूको संयुक्त टोलीले गत असार अन्तिम सातादेखि प्रतिष्ठान परिसरमा विशेष अनुगमन अभियान चलाएको थियो । सोमबारसम्म गरिएको सघन जाँचका क्रममा ती पसलहरूमा गम्भीर कानुनी त्रुटि र चरम लापरबाही फेला परेपछि टोलीले पसलहरू बन्द गराएको हो ।

इलाका प्रहरी कार्यालयका प्रहरी निरीक्षक बिनालाल साहका अनुसार अनुगमनका क्रममा आवश्यक कागजात नभएका, अरूकै नाममा पसल चलाएका, दर्तावाला फार्मासिस्ट नभएका र नवीकरण नगरिएका पसलहरू कारबाहीमा परेका हुन् । केही सञ्चालकहरू त अनुगमन टोली देख्नासाथ पसल बन्द गरेर भागेका थिए भने केहीले अनुगमन प्रक्रियामै अवरोध पुर्‍याएका थिए ।

 प्रतिष्ठान परिसरबाट केही समयअघि १२ जना बिचौलिया पक्राउ परेपछि प्रशासनले यो सक्रियता देखाएको हो । सिल गरिएका पसलका सञ्चालकहरूलाई आवश्यक प्रमाणसहित उपस्थित हुन निर्देशन दिइएको र छानबिनपछि थप कारबाही हुने बताइएको छ ।

अस्पताल परिसर जस्तो संवेदनशील क्षेत्रमा सञ्चालित व्यवसायहरू पूर्ण रूपमा कानुनी दायरामा आउनुपर्ने र यस्ता बेथिति रोक्न अनुगमनलाई आगामी दिनमा पनि निरन्तरता दिइने प्रशासनले स्पष्ट पारेको छ । राज्यका नियमनकारी निकायको यो कदमले उपभोक्ताको अधिकार संरक्षण हुनुका साथै बिरामीहरू गुणस्तरीय र भरपर्दो औषधि सेवा पाउनबाट वञ्चित हुनुपर्ने अवस्थाको अन्त्य हुने विश्वास गरिएको छ ।