त्रिभुवन विमानस्थलबाट ११ किलो गाँजासहित तीन भारतीय नागरिक पक्राउ

लागूऔषध नियन्त्रण अभियानका क्रममा त्रिभुवन अन्तर्राष्ट्रिय विमानस्थलबाट ११ किलो अवैध गाँजासहित तीन जना भारतीय नागरिक पक्राउ परेका छन्। नेपाललाई ट्रान्जिट बनाएर वा यहाँको बजारलाई लक्षित गरी भइरहेको तस्करी नियन्त्रण गर्न लागूऔषध नियन्त्रण ब्यूरोको टोलीले विमानस्थलमा चलाएको विशेष सुरक्षा अपरेसनका क्रममा यो सफलता मिलेको हो। पक्राउ पर्नेमा भारत, पञ्जाबका ३० वर्षीय सोनी र २३ वर्षीय जागरुप सिंह तथा हरियाणाका २२ वर्षीय साहिल रहेका छन्।

ब्यूरोको विमानस्थल शाखाबाट खटिएको प्रहरी टोलीले साउन १६ गते राति शङ्कास्पद यात्रुहरूको प्रोफाइलिङ र नियमित जाँच गर्ने क्रममा यो बरामदगी गरेको हो। थाइल्यान्डबाट हङकङ हुँदै क्याथे प्यासिफिक एयरवेजको उडान नम्बर CX ६०३ मार्फत नेपाल ओर्लिएका सोनी र जागरुपको झोला खानतलासी गर्दा भन्सार छलेर लुकाएर ल्याइएको ११ किलो गाँजा गाँजा बरामद भएको प्रहरीले जनाएको छ। सो अवैध सामान बुझ्न विमानस्थल बाहिर कुरिरहेका साहिललाई पनि प्रहरीले तत्कालै घेरा हाली नियन्त्रणमा लिएको थियो।

सुरक्षा निकायले पक्राउ परेका विदेशी नागरिकहरूको साथबाट गाँजासहित तस्करीमा प्रयोग भएका तीन थान पासपोर्ट र तीन थान मोबाइल फोन समेत प्रमाणका रूपमा बरामद गरेको छ। प्रहरीले प्रारम्भिक सोधपुछमा उनीहरू अन्तर्राष्ट्रिय गिरोहको भरियाका रूपमा सक्रिय रहेको जनाएको छ। पक्राउ परेका तीनै जनालाई हिरासतमा राखी ब्यूरोले लागूऔषध नियन्त्रण ऐनबमोजिम थप अनुसन्धान प्रक्रिया अघि बढाएको छ।