जता मतदाता त्यतै नेता

डडेलधुरा : प्रधानमन्त्री एवं कांग्रेस सभापति शेरबहादुर देउवाका लागि स्थानीय नेता तथा कार्यकर्ता खेतबारीमै पुगेर भोट मागिरहेका छन्। देउवा डडेलधुराबाट प्रतिनिधिसभा सदस्य उम्मेदवार छन्। मंसिर २१ गते हुने प्रतिनिधिसभा र प्रदेशसभा निर्वाचनका लागि नेता तथा कार्यकर्ता घरदैलोमा लागेका हुन्। मतदाताहरू प्रायः खेतबारीमा मल बोक्न, खर काट्न व्यस्त भएकाले नेताहरू त्यतै गएर आफू र आफ्नो पार्टीका लागि भोट मागिरहेका छन्।

खरिया काट्दै गरेका मीना थापा र माया थापालगायतलाई भेटेर प्रदेशसभा सदस्यमा आफू र प्रतिनिधिसभा सदस्यमा देउवाका लागि डडेलधुरा क्षेत्र नम्बर १ का उम्मेदवार रघुवर भट्टले भोट मागे। सभापति देउवा ‘उच्च पद’मा रहेको जानकारी दिँदै भट्टले ‘तपाईंहरूका समस्या समाधानका लागि हामी तत्पर छौं’ भन्दै भोट मागेको उनीहरूले सुनाए। खरिया काटिरहेका महिला पनि उनको कुरा ध्यान दिएर बीच-बीचमा जिज्ञासा राखिरहेका थिए। उनीहरूले गुनासा पनि राखिरहेका थिए।

‘हामीले भोट त दिँदै आएका छौं तर हाम्रा लागि कसैले पनि केही गरेनन्’, ३० वर्षीया मीनाले भनिन्, ‘यसपालि त जसले महिला हकहितका विषयमा बुलन्द आवाज उठाउँछ, हामीलाई घाँस काट्न छुटाउने प्रतिबद्धता व्यक्त गर्दछ त्यसलाई हामी भोट दिन्छौं।’ भट्टले हाँस्दै जवाफ दिए, ‘हामी तपाईंहरूको माग पूरा गर्ने प्रयत्न गर्छौं।’
हिउँदमा किसानहरू गहुँ बाली लगाउन व्यस्त हुन्छन्। महिलाहरू प्रायः खरिया काट्ने काममा लाग्छन्। मतदाताहरू घरदैलोमा भेटिन छोडेपछि नेताहरूले भोट माग्न खरिया काट्ने ठाउँसम्मै धाउन थालेका हुन्। वाम गठबन्धनका उम्मेदवार पनि खेतबारीमै गएर भोट माग्नमा व्यस्त देखिन्छन्। मतदाताहरू घरभन्दा पनि खेतबारीमा भेटिने हुँदा आफूहरू खेतबारीसम्मै गएर भोट मागिरहेको गठबन्धनका कार्यकर्ता बताउँछन्।

‘मतदाताले मत जाहेर गर्दा आफ्नो अधिकारको प्रयोग हुन्छ। हामी नेताहरू भोट माग्न जनताकै घरदैलोमा जानु उपयुक्त हुन्छ’, गठबन्धनबाट क्षेत्र नम्बर १ का उम्मेदवार पठानसिंह बोहराले भने।