कसरी चल्यो झापा ३ मा ‘म्याच फिक्सिङ’को हावा ?

झापा, १४ मंसिर– झापा ५ बाट उम्मेदवारी दिएपछि एमाले अध्यक्ष केपी शर्मा ओली देशब्यापी चुनावी कार्यक्रम सँगसँगै तीन पटक गृहजिल्ला झापा पुग्न भ्याएका छन् । झापा पुग्दा पनि ओली आफू उम्मेदवार रहेको क्षेत्र नं ५ भन्दा अन्यत्रकै कार्यक्रममा समय बढी खर्च गर्छन् । ओलीले यसरी लगातार गृहजिल्ला पुगिरहनु र आफ्नो क्षेत्र छोडेर भद्रपुर, विर्तामोड तथा मेचीनगरका कार्यक्रमहरुलाई प्राथमिकता दिनुको अर्थ छ– वाम गठबन्धनमा सामेल भएका माओवादी उम्मेदवार राम कार्की र राप्रपा उम्मेदवार राजेन्द्र लिङदेनलाई जिताएरै छोड्ने ओलीको संकल्प ।

राष्ट्रिय राजनीतिमा सर्वाधिक लोकप्रिय भएका ओलीलाई बारम्बार झापा जानु पर्ने वाध्यता पर्नुको कारण हो– झापा ३ का कांग्रेस उम्मेदवार तथा नेता कृष्णप्रसाद सिटौलाले चलाएको ‘म्याच फिक्सिङ’को हल्ला ।

उम्मेदवारहरुको समानुपातिक सूची निर्वाचन आयोगमा बुझाउने दिनसम्म कांग्रेस नेता सिटौलाको नाम कांग्रेसले समानुपातिक सूचीमा १ नम्बरमा राखेको थियो । देशभर राप्रपासँग चुनावी तालमेल गरेको कांग्रेसले झापा ३ मा राप्रपा नेता राजेन्द्र लिङदेनको उम्मेदवारीलाई समर्थन गर्ने सहमति गरेको थियो । त्यसबेला कांग्रेस नेता सिटौला भारतमा थिए । जव सिटौला भारतबाट फर्के र पार्टीले आफूले चुनाव लड्दै आएको क्षेत्रमा राप्रपा उम्मेदवारलाई समर्थन गरेको थाहा पाए, तव उनले आफूले सो क्षेत्र नछोड्ने अड्डी लिए । सिटौलाको यही अड्डीका कारण कांग्रेसले राप्रपालाई धोका दिनै पर्ने अवस्था आयो । त्यस्तो अवस्थामा वाम गठबन्धनले झापा ३ मा राप्रपाका लिङदेनलाई समर्थन गर्ने निर्णय गर्दै आफ्नो उम्मेदवारी दर्ता गरेन ।

स्थानीय चुनावको नतिजाका आधारमा झापा ३ मा एमाले, राप्रपा र माओवादीको मत जोड्दा ३१ हजार भन्दा बढी मत गठबन्धनका पक्षमा देखिन्छ । त्यस्तो अवस्थामा सिटौलाले झापा ३ बाट चुनाव जित्ने सम्भावना प्राय शुन्य हुन्छ । त्यसैले सिटौलाले चलाखीपूर्वक वाम गठबन्धनले आफूलाई सघाउने हल्ला चलाए । अझ काठमाडौंवाट प्रकाशित हुने एक राष्ट्रिय दैनिकमै एमाले अध्यक्ष ओली, माओवादी अध्यक्ष पुष्पकमल दाहाल र कांग्रेस नेता सिटौलाबीच म्याच फिक्सिङ भएको समाचार लेखाउन सिटौला सफल भएपछि त्यस्तो हल्ला चिर्न ओलीले मन्तब्य नै दिनुपर्ने अवस्था आयो ।

पछिल्लो पटक ओली आफ्नो निर्वाचन क्षेत्रका कार्यक्रम भन्दा बढी झापा १ र ३ का कार्यक्रमहरुमा सक्रिय छन् । झापा १ मा माओवादी नेता राम कार्की र २ मा राप्रपाका लिङदेनलाई समर्थन गरेका कारण उनीहरुलाई पनि जिताउनु ओलीले आफ्नो कर्तब्य सम्झेका छन् । त्यसैले ओली अघिल्लो पटक झापा पुग्दा झापा १ मा पर्ने मेचीनगर नगरपालिकाको कार्यक्रममा ब्यस्त भए जहाँ माओवादीका राम कार्कीलाई उनले भोट मागे । कार्कीको जितलाई ओलीले आफ्नो प्रतिष्ठाको विषय बनाएको यसैबाट पुष्टि हुन्छ ।

बुधवार तेस्रो पटक झापा पुगेका ओलीले बिहीवारै विर्तामोड र भद्रपुरमा आयोजित चुनावी सभालाई सम्बोधन गरे,  जुन राप्रपा नेता लिङदेन उम्मेदवार भएको झापा ३ मा पर्छ । कांग्रेस नेता सिटौलासँग म्याच फिक्सिङको हल्ला चलाइएका कारण ओलीले आफ्नो सम्बोधन नै त्यसैबाट सुरु गरे । उनले कांग्रेसले देशैभर राप्रपासँग चुनावी तालमेल गरे पनि झापामा राप्रपासँग गरेको सहमतिलाई धोका दिएको थाहा पाएपछि आफूहरुले लिङदेनको उम्मेदवारीलाई समर्थन गरेको वताए । उनले म्याच फिक्सिङको हल्लाबाट तरंगित नहुन आग्रह गर्दै एमाले उम्मेदवार भएका ठाउँमा सूर्च चिन्हमा, माओवादी उम्मेदवार भएका ठाउँमा हसिया हथौडामा र झापा ३ मा राप्रपाको गाई चिन्हमा मतदान गर्न मतदाता समक्ष आग्रह गरे । समानुपातिकमा आ–आफ्नो पार्टीको चुनाव चिन्हमा मतदान गर्न ओलीको आग्रह थियो ।

‘हामीले जसलाई समर्थन गरेका छौं, उसैलाई जिताएरै छोड्छौं’ लिङदेनलाई भोट माग्दै ओलीले भने, ‘म्याच फिक्सिङको हल्ला हार्नेहरुले चलाएका हुन्, त्यसबाट तरंगित हुनु आवश्यक छैन । हामी राजनीतिमा सिधासिधा भूमिका निर्वाह गर्छाैं, म्याच फिक्सिङ गर्दैनौं ।’ झापा ३ मा वाम गठबन्धनले लिङदेनलाई समर्थन गरे पनि गठबन्धनले कांग्रेस उम्मेदवार सिटौलालाई भित्र भित्रै जिताउन लागेको प्रचार सिटौला पक्षले गरेपछि औपचारिक कार्यक्रम राखेरै ओलीले त्यसको खण्डन गरेका हुन् । आफ्नो जित्ने आधार कमजोर भएपछि सिटौलाले एमाले र माओवादी समर्थकको मत तान्न म्याच फिक्सिङको हल्ला चलाएको बुझिएको छ ।

झापा २ मा एमालेकी पवित्रा खरेल निरौला र ४ मा एमालेकै लालप्रसाद सावा प्रतिनिधि सभाका लागि उम्मेदवार छन् ।

 चक्रपथ बाट