काठमाडौं ५ र ७ को रातभर रोकिएको मतगणना सुरु

२३ मंसिर, काठमाडौं । काठमाडौं क्षेत्रनम्बर ५ र ७ को मतगणना शनिबार बिहान ८ बजेबाट सुरु भएको छ । मुचुल्कामा भन्दा बढी मत गणनाको क्रममा देखिएपछि रातभर गणना रोकिएको थियो ।

बिहान वाम गठबन्धन र लोकतान्त्रिक गठबन्धनबीच सहमति भएपछि गणना सुरु भएको दुबै निर्वाचन क्षेत्रका निर्वाचन अधिकृतहरुले जानकारी दिएका छन् ।

टोखा २ क्वाखल र सरस्वती ३ को बुथमा मुचुल्कामा भन्दा बढी मत देखिएपछि कांग्रेसका प्रतिनिधिहरुले गणनामा विरोध गरेपछि गणना रोकिएको थियो ।

काठमाडौं क्षेत्रनम्बर ५ का निर्वाचन अधिकृत चाणक मणी अर्यालले रातभर रोकिएको मत गणना बिहानबाट सुरु भएको  जानकारी दिए ।

काठमाडौं ५ मा कांग्रेसका प्रकाशशरण महत र एमालेका महासचिव ईश्वर पोखरेल उम्मेदवार छन् ।

यसैगरी काठमाडौं क्षेत्रनम्बर ७ को मतगणना पनि सुरु भएको सो क्षेत्रका निर्वाचन अधिकृत कपिलमणि गौतमले जानकारी दिए ।

गौतमले  भने, ‘मुचुल्का उठाउने क्रममा महिला र पुरुष मतदाताको संख्या उल्लेख गर्ने क्रममा ३ मत बढी देखिएपछि रोकिएको थियो । बिहान ८ बजेबाट गणना सुरु भएको छ ।’

गौतमका अनुसार एमाले उम्मेदवार रामविर मानन्धरले ५ हजार २५ मत पाएका छन् ।

उनलाई राप्रपाका विक्रमबहादुर थापाले २ हजार ७९२ मतसहित पछ्याइरहेका छन् । यसैगरी साझा विवेकशीलका उम्मेदवार अनुपा श्रेष्ठले १ हजार ५६२ मत पाएकी छन् ।