धुर्मस–सुन्तलीको बस्ती हस्तान्तरण कार्यक्रम अगाडि सर्यो

काठमाडौं, २७ पुस । रौतहटको चन्द्रपुर नगरपालिका–८ को सन्तपुरमा धुर्मुस सुन्तली फाउण्डेसनले चौंथो परियोजनाअन्तर्गत ४७ घरपरिवार बाढीपीडित दलित समुदायका लागि एकीकृत नमुना सन्तपुर बस्ती हस्तान्तरण कार्यक्रम अगाडि सरेको छ । सीताराम कट्टेल (धुर्मस)ले माघ २४ गते हुने भनिएको बस्ती हस्तान्तरण कार्यक्रम माघ २१ गते नै हुने बताएका छन् ।

“आज ९० दिन भएछ एकीकृत नमुना सन्तपुर बस्ती निर्माणमा जुटेको । निकै खुसी छु । उत्तिकै भाबुक पनि छु । सहयोगी मनहरुले मन फराकिलो नबनाइदिनु भएको भए हामीले बस्तीको परिकल्पना मात्र गरेर सम्भब थिएन”, धुर्मुसले भनेका छन्, “५ करोड ९५ लाख अनुमानित रकम मध्य अब लगभग १ करोड ५० लाख रकम यो परियोजनालाई अपुग छ र हालसम्म ४ करोड ३१ लाख भन्दा बढी रकम खर्च भइसकेको छ तर आशावादी छु ।” उनले माघ २४ गते बस्ती हस्तान्तरणको संकल्प गरेकोमा निर्धारित समय भन्दा अगाबै माघ २१ गते बस्ती हस्तान्तरण गरिने बताउँदै माघ २१ गते बस्ती हस्तान्तरण समारोहका लागि चुले निम्तो समेत दिएका छन् ।

नमुना बस्तीको ९० प्रतिशत निर्माण कार्य पूरा भएको धुर्मुस सुन्तली फाउण्डेशनका अध्यक्ष तथा कलाकार सीताराम कट्टेल “धुर्मुस” ले बताए । बस्ती बनाउन २सय ६१ जना कामदार खटिएका छन् । हालसम्म ४७ वटै घर निर्माण सम्पन्न भइसकेको छ । अहिले भ्यु टावर र मन्दिर बाहेकका अरु संरचनाहरु सबै अन्तिम चरणमा पुगेका छन् । बस्तीको बाटो, बिजुली, खानेपानीलगायतका कामहरु बाँकी रहेको र १० दिनभन्दा अगावै बस्ती निर्माण पूरा हुने जनाइएको छ ।