नेपाल पुलिस क्वाटरफाइनल प्रवेश

सुरुङ्गा, झापा, २० फागुन, झापाको बिर्तामोडमा जारी तेस्रो रमपम झापा गोल्डकपको आज भएको खेलमा रेजिन सुब्बाको एकमात्र गोलको मद्दतले नेपाल पुलिस क्लब विजयी बन्दै क्वाटरफाइनलको यात्रा तय गरेको छ ।

रुपन्देही–११ लाई पाखा लगाउन प्रतियोगिताको ८१ औँ मिनेट पर्खनुपरेको थियो । सुमन लामाको पासलाई सदुपयोग गर्दै सुब्बाले बललाई पोष्टको दिशा दिएका थिए । रुपन्देही ११ का गोलकिपर सोजित गुरुङ बिट भइसकेको अवस्थामा डि एरियाभित्र रहेका सुब्बाले गोल गरेका थिए ।

खेलको म्यान अफ द म्याच बिजेता नेपाल पुलिस क्लबका सुमन लामा घोषित भए । उनले रु २५ हजार पुरस्कार पाएका छन् । सोमबारको खेल सशस्त्र प्रहरीको एपिएफ र थ्री स्टार क्लबबीच हुने आयोजक समितिले जनाएको छ ।

गोल्डकपको विजेताले रु १२ लाख ५१ हजार र ट्रफी पाउनेछन् भने उप विजेताले रु छ लाख र ट्रफी पाउनेछन् ।