मोदी आउनुअघि नै पार्टी एकता !

काठमाडौं, १२ वैशाख । माओवादी केन्द्रका अध्यक्ष पुष्पकमल दाहाल प्रचण्ड गृहजिल्ला चितवनमै व्यस्त हुने भएका छन् ।

प्रचण्ड मंगलबार चितवन पुग्नेवित्तिकै उनले शुक्रबार (वैशाख २४) एमालेसँगको पार्टी एकताको मिति तोकिने जानकारी दिएका थिए ।

मंगलबार बिहान साढे ७ देखि ९ बजेसम्म प्रधानमन्त्री केपी ओलीसँग डेढ घन्टा छलफल गरेका प्रचण्ड त्यसपछि चितवन लागेका थिए । उनले सञ्चारकर्मीसँग भने, ‘दुई पार्टीका अध्यक्षको व्यस्तताले गर्दा एकता प्रक्रियाले गति लिन नसकेको हो । वैशाख २४ गते एकताको मिति टुंगो लाग्छ ।’

केही समयदेखि एमाले र माओवादीबीच पार्टी एकता प्रक्रियाले गति लिन नसकेकै बेला प्रचण्डको वैशाख २४ गते एकताको मिति टुंगो लाग्ने अभिव्यक्तिले एकाएक सबै विवाद कसरी मिल्यो ? भन्ने चासो सर्वत्र देखिएको छ । लेनिन जयन्तीका दिन प्रचण्डले राष्ट्रिय सभागृहमा कसैले नसोचेको मितिमा ड्याम्म पार्टी एकता हुने बताएका थिए ।

प्रचण्डले कसैले नसोचेको मिति मे ५ तारिख भएको बताइन्छ । सो दिन कार्ल माक्र्सको जन्म दिन । एमाले र माओवादी केन्द्रबीच त्यसै दिन पार्टी एकता हुन सक्ने बताइएको छ । अहिले भारत एमाले र माओवादी पार्टी एकता गराउन निकै सक्रिय भएर लागेको स्रोतले बतायो । वैशाख २८ गते भारतीय प्रधानमन्त्री नरेन्द्र मोदी नेपाल आउनुअघि नै दुई पार्टीबीच एकता गरिसक्ने गरी होमवर्क अघि बढाइएको बताइन्छ ।

सुरुका दिनमा भारत पार्टी एकताको विपक्षमा भए पनि पछिल्लो समय एकाएक सक्रिय भएर लागेको बताइएको छ । प्रधानमन्त्री एवं एमाले अध्यक्ष ओलीलाई तत्काल कुनै पनि हालतमा कमजोर बनाउन नसकिने निष्कर्षका साथ भारतले पार्टी एकतापछि उनलाई अल्पमतमा पार्ने वा त्यत्तिकै अल्झाएर राख्ने रणनीतिमा भारतीय कूटनीतिज्ञहरू लागेको स्रोतले बतायो ।

यस विषयमा ओली पनि बेखबर भने छैनन् । सोही कारण पार्टी एकतापछि प्रचण्ड निकट नेताहरू नारायणकाजी श्रेष्ठ, जनार्दन शर्मा, अग्निप्रसाद सापकोटा, टोपबहादुर रायमाझीलगायतलाई आफ्नो समूहमा सामेल गराउन ओलीले भित्री तयारी गरिसकेको बुझिएको छ । अहिले यिनै नेताहरूको दबाबका कारण प्रचण्ड पार्टी एकतामा लचिलो बनेको माओवादी एक नेताले बताए ।