ट्राफिक प्रहरीको मास्क खरिदमा भ्रष्टाचार

काठमाडौं, २० असार ।  महानगरीय ट्राफिक प्रहरी महाशाखाका लागि आवश्यक १ हजार ६ सय २३ थान मास्क खरिदमा भ्रष्टाचार भएको छ ।

ट्राफिक प्रहरीका लागि प्रदूषणरहित मास्क खरिदमा १६ लाख रुपैयाँ भन्दा बढी घोटाला भएको छ ।

सानो इकाईको खरिदमा पनि प्रहरीमा नांगो भ्रष्टाचार हुने गरेको छ भने ठूला खरिदमा झन् कति हुन्छ होला भन्ने कुरा ट्राफिक प्रहरीले गरेको ‘एन ९९ स्ट्यान्डर्ड मास्क’ खरिदमा देखिएको छ । ट्राफिक प्रहरीले २०७५ जेठ ३ मा मास्क खरिदका लागि टेण्डर गरेको थियो ।

त्यो टेण्डरमा मल्टी टेडिङ प्रालि र सायोन इन्टरप्राइजेज अनामननगरले प्रस्ताव पेश गरेका थिए । मल्टी टेडिङले ३१ लाख १७ हजार ७ सय ८३ रुपैयाँ (भ्याटसहित) मा मास्क एन ९९ को १६२३ थान मास्क दिने प्रस्ताव गरेको थियो । दृष्टि साप्ताहिकका अनुसार  सायोनले ४७ लाख ५९ हजार २ सय ४ रुपैयाँ ५ पैसामा दिने गरी टेण्डर हालेको थियो ।

यसमा न्यून मूल्यमा मास्क आपूर्ति गर्ने मल्टी ट्रेडिङलाई नदिई १६ लाख रुपैयाँ बढी मूल्यको कम्पनीलाई मास्क खरिदको टेण्डर दिइएको छ । ट्राफिक महाशाखाले सायोनलाई २०७५ असार ७ गते आसयपत्र समेत दिइसकेको छ । सार्वजनिक खरिद ऐन र नियमावली अनुसार कम मूल्य पेश गर्ने कम्पनीलाई टेण्डर दिनुपर्ने हुन्छ ।

मल्टी ट्रेडिङको मास्क महाशाखाले तोकेको गुणस्तरकै भए पनि घुसको चलखेलमा सायोनबाट खरिद गर्ने गरी आसयपत्र दिइएको छ । ट्राफिक प्रहरी महाशाखाका प्रमुख एसएसपी वसन्तकुमार पन्तले सायोन इन्टरप्राइजेजबाट १० लाख घुस खाएर कम दरको कम्पनीलाई टेण्डर नदिएको स्रोतले बताएको छ । प्रहरीमा भएको सानो खरिदमा भएको भ्रष्टाचारको यो सानो दृष्टान्त हो ।