संविधानलाई उत्कृष्टतापूर्वक जनताको जनजीविकासँग जोड्नुपर्छ : युवाहरु

काठमाडौं, ३ असोज । युवा सङ्घ नेपालका अध्यक्ष रमेश पोडेल र योङ कम्युनिष्ट लिगका अध्यक्ष रामप्र्रसाद सापकोटा “दीपशिखा”ले अबको बाटो संविधानलाई उत्कृष्टतापूर्वक जनताको जनजीविकासँग जोडेर लैजानुपर्ने बताएका छन् । अध्यक्षद्वयले संविधान दिवसको अवसरमा संयुक्त विज्ञप्ति जारी गरी यस्तो बताएका हुन् ।

विज्ञप्तिमा देशको स्रोत, साधन, सम्पदा र संस्कृतिको दृष्टिले विश्वका अन्य सम्पन्नशाली मुलुकहरुभन्दा कम नभए तापनि युवा श्रमशक्ति विदेशी भूमिमा खर्च भइरहेको औंल्याइएको छ । मुलुकलाई समृद्ध र बनाउँदै आम जनतालाई सुखी र खुशी बनाउने कम्युनिष्ट सरकारको महाअभियानलाई रोक्न र अस्थिरतातर्फ धकेल्न विभिन्नखाले प्रतिक्रियावादी शक्तिहरु अहिले सबैखाले हथकण्डाहरु अपनाउँदै कम्मर कसेर लागेको पनि विज्ञप्तिमा उल्लेख छ ।

सात दशक लामो अथक प्रयास र बलिदानीपूर्ण संघर्षबाट प्राप्त संविधानसभाले संविधान घोषणा गरेको तेस्रो वर्ष पूरा गरी चौथो वर्षमा प्रवेश गरेको उल्लेख गर्दै संयुक्त विज्ञप्तिमा ऐतिहासिक जनआन्दोलन, जनयुद्ध तथा विभिन्न आन्दोलनहरुको उपलव्धिको रुपमा लोकतान्त्रिक गणतन्त्र, संविधान, संघीयता, समानुपातिक तथा समावेशितासहित आम नेपाली जनताको खुशी र समृद्धिका लागि यो संविधानको सफल कार्यान्वयन हुनुपर्ने औंल्याइएको छ ।