नेपाल भारतमा विलय हुने दिशामा अघि बढ्दैः चित्रबहादुर केसी

काठमाडौं, ८ असाेज । राष्ट्रिय जनमोर्चाका अध्यक्ष चित्रबहादुर केसीले अंगिकृत नागरिकका सन्तानले  सजिलै वंशजकाे नागरिकता पाउने व्यवस्थाले नेपाल  भारतमा विलय हुने दिशामा अघि बढेको बताएका छन् ।

साेमबार काठमाडाैँमा अायाेजित एक कार्यक्रममा बाेल्दै केसीले साे कुरा बताएका हुन् ।

‘अंगिकृत नागरिकता लिनेमा अधिकांश भारतबाट नेपाल छिरेकाहरु छन्’, नेपालको कर्मचारीतन्त्र पनि बाह्य शक्तिको प्रभावमा आफ्नो दुनो सोझ्याउनेतर्फ मात्र केन्द्रित भएको उनको आरोप छ।   अवैध तरिकाले नागरिकता लिएकाहरुको नागरिकता खारेज गर्नका लागि शक्तिशाली  आयोग बनाउनु पर्ने खाँचो रहेको पनि उनले औँल्याए।

‘अहिलेसम्म अवैधानिक तरिकाले नागरिकता पाउनै नहुने मान्छेले नेपाली नागरिकता पाएका छन्’, देशलाई डामाडोल पार्नेहरुको षड्यन्त्रको विरोधमा सबै प्रतिबद्ध हुनुपर्ने आवश्यकता आइपरेको उनले बताए । देश बचाउनु पर्ने भन्दै उनले भने, ‘देश रहे मात्रै हामी रहूँला ।’