अख्तियारले घुस खाने पाठकविरुद्ध मुद्दा चलाउने तयारी

काठमाडौं । महान्यायाधिवक्ता कार्यालयले घुस प्रकरणपछि राजीनामा दिएका अख्तियार दुरुपयोग अनुसन्धान आयोगका राजनारायण पाठकविरुद्ध मुद्दा चलाउन राय दिएको छ । योसँगै अख्तियारले पाठक विरुद्ध मुद्दा चलाउने तयारी थालेको छ ।

अख्तियारले महान्यायाधिवक्ता समक्ष पाठक विरुद्ध मुद्दा चलाउने विषयमा राय मागेको थियो ।
महान्यायाधिवक्ता कार्यालयले संविधान अनुसार अनुसन्धान गरी दोषी देखिएमा मुद्दा दर्ता गर्न पाउने भन्दै मुद्दा दर्ता गर्न राय दिएको छ ।

सार्वजनिक पद धारण गरेको व्यक्तिले भ्रष्टाचार गरेको ठहरिएमा मुद्दा दर्ता गर्न सक्ने व्यवस्था भएकाले सोहीअनुसार अगाडि बढाउन सक्ने व्यवस्था संविधानमा भएकाले त्यसै अनुसार अघि बढ्न सुझाव दिएको महान्यायाधिवक्ता कार्यालय सुत्रले जनाएको छ ।

अख्तियारको आफ्नै ऐनमा पनि अनुसन्धान गरी भ्रष्टाचार गरेको देखिएमा मुद्दा दर्ता गरी कारबाही गर्न सक्ने व्यवस्था भएकाले त्यसैअनुसार अघि बढ्न सुझाव दिएको हो।

पाठकले चाँगुनारायणस्थित नेपाल इन्जिनियरिङ कलेजको डेढ अर्ब रुपैयाँको सम्पत्ति हड्प्ने विषयमा देखिएको विवाद मुद्दा मिलाउने बहानामा ७८ लाख रुपैयाँ घुस लिएको सार्वजनिक भएपछि राजीनामा दिएका थिए।

संविधानको धारा धारा २३९ मा टेकेर मुद्दा चलाउनु भन्ने महान्यायाधिवक्ता अग्निप्रसाद खरेलले अख्तियारलाई राय दिएका हुन् ।