अमेरिकामा नेपालीको लागि टिपिएसमा पुनः दर्ता खुला

काठमाडौं, १० जेठ । हाल टेम्पोररी प्रोटेक्टेड स्टाटस (टिपिएस) सुविधा पाइरहेका नेपालीहरुले यो सुविधाको निरन्तरताको लागि मे महिनाको २२ तारिख देखि जुलाई २३ सम्म पुनः दर्ता गर्न आव्हान गरेको छ ।

अमेरिकाको यूएस सिटिजन्सीप एण्ड इमिग्रेसन सर्भिसले मंगलबार उक्त आव्हान गरेको हाे । हाल यो सुविधा पाउनेहरुको म्याद सन् २०१९ जुन महिनाको २४ तारिख सम्ममात्र छ ।

यसरी पुनः दर्ता गर्नेले निवेदकले टिपिएसको लागि आई–८२१ फर्म भरेर बुझाउनु पर्ने जानकारी दिइएको छ । त्यस्तैगरी आई–७६५ फर्ममा इम्प्लोइमेन्ट एप्लीकेसन डकुमेन्ट समेत बुझाउनु पर्नेछ ।

यसरी पुनः दर्ता गर्ने सबैले टिपिएस सुविधा पाउँछ भन्ने पक्का हुँदैन तर योग्यता पुगेका र वैध रुपमा बसेकाहरुले यो सुविधा पाउने जानकारी दिइएको छ । यद्यपी टिपिएस सुविधाको म्याद नथप्ने निर्णय गरेपनि नेपालीहरुको इम्प्लोइमेन्ट एप्लीकेसन डकुमेन्टको म्याद चाहिं स्वतः १८० दिनले बढाइएको छ । अब यसको म्याद डिसेम्बर २१, २०१८ सम्म रहने छ ।

गत महिना अमेरिकाको होमल्याण्ड सेक्युरिटीका सेक्रेटरी क्रिष्टीयान निल्सनले नेपालीले पाउँदै आएको टिपिएस सुविधाको म्याद नथप्ने निर्णय गरेकी थिइन । तत्पश्चात उनले परिवर्तीत अवस्था व्यवस्थीत गर्नको लागि समय दिन टिपिएसको म्यादलाई १२ महिनापछि मात्र सकिने बनाएकी थिइन् । अब नेपालीले पाएको टिपिएस सुविधा सन् २०१९ को जुन २४ मा सकिनेछ ।

नेपालमा गएको विनाशकारी भुकम्पपछि अमेरिकाले नेपालीहरुको लागि टिपिएस सुविधा प्रदान गरेको थियो । हाल करिब ९ हजार नेपालीहरुले यो सुविधा पाइरहेका छन् ।