आज भारतीय प्रधानमन्त्री मोदी नेपाल आउँदै, सुरक्षा व्यवस्था कडा

काठमाडौँ, २८ वैशाख- प्रधानमन्त्री केपी शर्मा ओलीको निमन्त्रणामा आजदेखि भारतका प्रधानमन्त्री नरेन्द्र मोदी नेपालको दुईदिने राजकीय भ्रमणमा आउँदैछन् । बिहान सवा १० बजे मोदी सिधै जनकपुर आइपुग्ने कार्यक्रम छ । त्यसपछि उनी काठमाडौं आउनेछन् ।
मोदीको आगमनमा जनकपुर र काठमाडौंको सुरक्षा व्यवस्था निकै कडा पारिएको छ ।

भारतका कार्यकारी सरकार प्रमुखका रुपमा तेस्रो पटक हुन लागेको यो भ्रमणले आपसी आत्मीयता, मैत्री र शताब्दीऔँ पुरानो दुई देशबीचको सम्बन्धलाई थप प्रगाढ तुल्याउने अपेक्षा गरिएको छ ।
प्रधानमन्त्री ओलीको गत महिना सम्पन्न भारतको राजकीय भ्रमणको प्रत्युत्तर भ्रमणका रुपमा पनि प्रधानमन्त्री मोदीको भ्रमणलाई लिइएको छ ।

राजनीतिक तहमा हुने यस्ता उच्चस्तरीय भ्रमणले एकअर्काका पीरमर्का र विकासका आकांक्षा बुझ्न मद्दत मात्र पुग्दैन बदलिँदो विश्व परिवेशमा मतैक्यताका साथ क्षेत्रीय र अन्तर्राष्ट्रिय चासोका साझा विषयमा सहकार्य गर्न सघाउँछ ।

प्रधानमन्त्री मोदीले नेपाल भ्रमणको पूर्वसन्ध्यामा ‘ट्विट्’ समेत गरेका छन् । नेपाल र भारतको परम्परागत सम्बन्धलाई नयाँ चरणमा प्रस्तुत गर्न खोजेका छन् । मोदीले ट्विटमा भनेका छन्, “लोकतन्त्रका उपलब्धिलाई संस्थागत गर्न तथा आर्थिक समृद्धि हासिल गर्ने नयाँ युगमा प्रवेश गरेको नेपाललाई अटल साझेदारका रुपमा भारत प्रस्तुत हुन चाहन्छ” नेपाल सरकारको ‘समृद्ध नेपाल र सुखी नेपाली’ निर्माणको परिकल्पना साकार पार्ने बताएका छन् ।