आफ्नै पार्टिका सांसदद्वा सञ्चारमन्त्रीको राजीनामा माग

नेकपाका नेता तथा सांसद रामवीर मानान्धरले गुठी प्रथालाई सामन्तवाद भनेकोमा सुचना तथा संचार प्रविधि मन्त्री गोकुल बास्कोटाको राजिनामा मागेका छन् । शनिबार रिपोर्टर्स क्लब नेपालले आयोजना गरेको विशेष बहसमा बोल्दै सत्तारुढ दलकै नेता मानन्धरले गुठीलाई सामन्ती पं्रथा जोडेकोमा कडा आपत्ती जनाउँदै राजिनामा दिनुपर्ने बताएका हुन् । “सरकार प्रवक्ताको रुपमा जसलाई सामन्ती भन्नुभएको छ त्यो फिर्ता लिनुस्, होइन भने राजिनामा दिनुस् । प्रवक्ता जनताको हो । धेरै ठूलो स्वरले बोल्ने होइन । ” उनले भने । सडकमा ओर्लिएका जनतालाई सान्त्वना दिनुपर्नेमा मन्त्री बाँस्कोटाले आगोमा घिउ थप्ने काम गरेको मानन्धरको आरोप छ । “संचारमन्त्रीजी, कि क्षमा माग्नुस, कि राजिनामा दिनुस् ।” उनले भने ।

मुलुक चिनाउने गुठीलाई सामन्तवादको सूचक भनेको भन्दै मानन्धरले राजिनामा नै माग्नुपर्ने अवस्था आएको पनि बताए । “आज गुुठियारहरुलाई जसरी आक्षेप लगाउने र अपमान गर्ने गरिएको छ, यसले अब मन्त्रीहरुको दिनगन्ती सुरु भएको छ ।” मानन्धरले भने ।

मन्त्रीहरुको यस्तै प्रवृत्ति जारी रहे गणतन्त्रसमेत धरापमा पर्ने उनको तर्क थियो ।

प्रधानमन्त्री केपी ओली फर्किएपछि पनि विधेयक फिर्ता लिने निर्णय नगरे काठमाण्डौमा आन्दोलनको आँधीबेहेरी ल्याउने चेतावनीसमेत मानन्दधरले दिएका छन् ।

“म यहीँबाट भन्न चाहन्छु, यदी प्रधानमन्त्रीले पनि फिर्ता लिन चाहनुभएन भने हेर्दैगर्नुहोला काठमाण्डौ के हुन्छ । यो मेरो चुनौति होइन, सरकारलाई सुझाब हो ।” उनले भने ।

सरकारले ल्याएको गुठी विधेयकले कसैलाई फाइदा नहुने मानन्धरको दावी छ । बाबु बाजेले गुठीमार्फत संरक्षण गरेको सम्पत्तिलाई अहिलेको सरकारले मास्न खोजेको उनको आरोप छ ।

क्लबका सभापति ऋषि धमलाको अध्यक्षतामा सम्पन्न साक्षात्कारमा प्रमुख प्रतिपक्षी दलका नेता तथा सांसद भिमसेन दास प्रधानले गुठी विधेयक फिर्ता नभएसम्म संसद चल्न नदिने बताए ।

कुनै पनि हालतमा विधेयक फिर्ता गर्नुपर्ने प्रधानको भनाई थियो । विधेयक फिर्ता भएन भने काठमाण्डौ जुरुक्क उठ्ने र त्यसलाई कसैले पनि रोक्न नसक्ने प्रधानको चेतावनी थियो । प्रधानले मन्त्री बास्कोटा धर्म संस्कृतिबारे अनभिज्ञ हुनु दुर्भाग्य भएको बताए ।

गुठी विधेयककै कारण संघीयता समेत धरापमा परेको भन्दै प्रधानले प्रधानमन्त्री केपी ओली नै संघीयताविरोधीको रुपमा देखा परेको जिकिर गरे । ६२–६३ को आन्दोलनका बेला घरमा बसेर बयलगाढा चढेर अमेरिका पुगिदैन भन्ने ओली अहिले धर्म संस्कृति मास्न लागिपरेको आरोप लगाए ।

ओलीले होली वाइन खाएको आरोप लगाउँदै प्रधानले नेपाली मौलिक संस्कृति मास्न खोजेको जिकिर गरे । “गुठी विधेयक फिर्ता गर्नुपर्छ । फिर्ता भएन भने कुनै पनि हालतमा संसद चल्न दिँदैनौँ । ४ गतेपछि के हुन्छ हेर्दै जानुस् ।” प्रधानले भने ।

साक्षात्कारमा पशुपति विकास क्षेत्र विकास कोषका पूर्व सदस्य सचिव गोविन्द टण्डनले पनि सरकारले ल्याएको गुठी विधेयकले संस्कृतिमाथि हस्तक्षेप गर्न खोजेको आरोप लगाए ।

यो पनि पढ्नुस
सत्तारुढ दलकै सांसदले किन गणतन्त्र उल्टन सक्ने भने

सत्तारुढ नेपाल कम्युनिष्ट पार्टीका सांसद रामवीर मानन्धरले गणतन्त्र उल्टन सक्ने औल्याएका छन् । सरकारको कामकारबाही गणतन्त्र उल्टने दिशातर्फ बढेको भन्दै समयमै सचेत हुन आग्रह गरे ।

शनिबार रिपोर्टर्स क्लब नेपालको साक्षात्कारमा बोल्दै मानन्धरले गुठीबारे उठेको विषयमाथि प्रधानमन्त्री केपी शर्मा ओलीले समयमै सच्याएर अगाडि नबढे गम्भीर परिणाम उत्पन्न हुने चेतावनी दिए । ‛जनताले गणतन्त्र ल्याएका हुन्, गणतन्त्र उल्टाउन पनि सक्छन्,’उनले भने, ‛असार २ गते प्रधानमन्त्रीले स्वदेश आउनेवित्तिकै गुठीबारे माग सम्बोधन नगरे ४ गते नसोचिएको परिणाम हुन्छ ।’

देशमा आन्दोलनको आँधी आइरहेको भन्दै त्यसले धेरैलाई बडार्न सक्ने चेतावनी दिए । देशमा राणा, राजा सक्ने जनताले देश र संस्कृतिविरुद्ध लाग्नेहरुलाई नछाड्ने बताए ।

साम्प्रदायिक दंगा भड्काउनेहरु सक्रिय भइरहेकोमा सबै सचेत हुनुपर्ने बताए । सरकारमा रहेकाहरु स्थिति साम्य पार्न लाग्नुपर्नेमा उल्टो घ्यू थप्न लागेको भन्दै आलोचना गरे ।

धर्म संस्कृतिविरुद्ध गतिविधि बढिरहेको भन्दै त्यसलाई सहन नसकिने बताए । ‛चीनमा पनि कम्युनिष्ट छन् तर संस्कृतिको रक्षा गर्दै विकास निर्माणमा लागिपरेका छन्’, मानन्धरले भने ।

गुठीलाई सामन्त भन्ने सरकारका प्रवक्ता गोकुल बाँस्कोटाप्रति आक्रोशित भएका मानन्धरले उनको राजीनामा मागे । मुलुक चिनाउने गुठी सामन्त र शोषकको व्यवस्था हो भने मन्दिर के हो ? देशको संस्कृतिमाथि आक्षेप र अपमान गर्नेहरु खतरनाक हुने भन्दै सचेत हुनुपर्ने बताए ।