आर्यघाटमा समेत चल्छ कमिसनको चलखेल

काठमाडौं, २७ माघ – पशुपति आर्यघाटमा दाहसंस्कार गर्दा चाहिने सामाग्री पशुपति क्षेत्र विकास कोषले तोकेको पसलमा किन्नुपर्ने बाध्यता छ। दाहसंस्कार गर्दा बाँस, फूलमाला, दाउरा, कात्रो, पीताम्बरलगायत सामाग्री चाहिन्छ। कोषका कर्मचारीले यी सामाग्री बेच्ने पसलबाट कमिसन लिने गरेको स्रोतको दाबी छ।

शोकमा परेका आफन्तलाई कोषका कर्मचारीले दाहसंस्कार सामाग्री फलानो पसलबाट किन्नुस् भन्दै तोकिदिने गरेका छन् । शोकमा परेका बेला कसैले केही नबोल्ने हुँदा त्यसको फाइदा लिन कर्मचारीको मिलेमतोमा यसो गरिएको हो।

पसल तोकिदिएबापत कोषका कर्मचारीले बिक्री भएको सामानको मूल्यअनुसार कमिसन लिने गरेका छन्। माघ १९ गते कुपण्डोलका विष्णु खड्कालाई दाहसंस्कारका लागि आर्यघाट पुर्याइयो । दाहसंस्कारका लागि शुरुमा कोषको कार्यालयका वातावरणीय शुल्क तथा जलाउनेको ज्यालासहित २८ सय रुपियाँ तिरेर नाम दर्ता आफन्तले गरे ।

दर्तापछि कोषका कर्मचारी शम्भु पौडेलले भने, यो चिट लिएर सामान किन्न पारिको पसलमा जानुस् । मृतकका आफन्त सामग्री किन्न ब्रह्मनालपारिको घाट पसलमा पुगे । आजको नागरिक दैनिकमा खिलक बुढाथोकीले खबर लेखेका छन् ।