इपिएल क्रिकेटः इंल्याण्ड यु१९ का कप्तान हाेल्डेन चितवन टाइगर्सबाट खेल्ने !

काठमाडौँ, ११ भदौ । नेपालको सबैभन्दा प्रतिष्ठित क्रिकेट लिग एभरेष्ट प्रिमियर लिग (इपिएल) नजिकिँदै गर्दा सबै टोलिले आफ्ना आयातित खेलाडी सार्वजनिक गरिरहेका छन् । यस्तैमा चितवन टाइगर्सले आफ्नो दोस्रो विदेशी खेलाडीका रुपमा इंल्याण्डका १९ वर्ष मुनिको राष्ट्रिय टोलिका कप्तान म्याक्स होल्डेनलाई अनुबन्धन गरेको छ ।

यसअघि पहिलो ओभरसिज खेलाडीको रुपमा इंल्याण्डकै जेम्स फुलरलाई चितवनले अनुबन्धन गरिसकेको थियो । उनी बेलाएतकै मिडलसेक्स क्लबबाट लामो समय देखि व्यवसायिक क्रिकेट खेलिरहेका छन् । तिन खेलाडीमा चितवनले अब एक मात्र खेलाडी अनुबन्धित गर्न बाँकि छ ।

इपिएलको पहिलो दोस्रो संस्करणमा चितवन टाईगर्स विविध आन्तरिक कारणले अन्तिम स्थानमा रहेको थियो । यो पटक भने ट्रफि उचाल्ने दाउमा चितवन प्रतियोगितामा भाग लिनेछ ।

यसअघि काठमाडौँ किंग्स इलेभनले आफ्ना दुई ओभरसिज खेलाडी सार्वजनिक गरिसकेको छ भने अर्को खेलाडी जिम्बावेको हुने संकेत दिएको छ । धेरैले तेस्रो खेलाडी जिम्बावेका अलराउण्डर सिकन्दर राजा रहेको लख काटेका छन् । भने अरु दुई खेलाडी मध्ये एक आयरल्याण्डका अलराउण्डर केविन ओब्राएन हुन भने अर्का युएइका कप्तान रोहन मुस्ताफा रहेका छन् ।

चितवन र काठमाडौले टेस्ट राष्ट्रका खेलाडीलाई अनुबन्धन गरेरसँगै इपिएल अझ रोमाञ्चक हुने त छँदैछ साथै यी टिमले अन्य टोलिलाई अझ स्तरिय खेलाडी ल्याउन दबाव पनि दिएका छन् ।