उपप्रधानमन्त्री पोखरेलको राज्य व्यवस्था समितलाई चुनौती-हाजिर हो भन्ने ? (भिडियोसहित)

काठमाडौं, २५ फागुन । उपप्रधान तथा रक्षामन्त्री ईश्वर पोखरेलले संसदको राज्य व्यवस्था समितिबाट बैठकमा उपस्थिति हुनेबारे आफूलाई कुनै पत्र प्राप्त नभएको बताएका छन् । औपचारिक ढंगले चिठी दर्ता नभएको अवस्थामा बाटोमा हिंड्दा डाकेको भरमा नजाने बताए । उनले भने, ‘हाजिर हो भन्ने ? समितिमा बितण्डा मच्चाइएको छ ।’

राज्य व्यवस्था समितिको कार्यशैलीप्रति पोखरेलले तिव्र असन्तुष्टि पोखे । ‘राज्य व्यवस्था समितिमा सेलिब्रिटी हुने तरिकाले काम भइरहेको छ,’ उपप्रधानमन्त्री पोखरेलले ऋषि धमलासँग प्राइम टाइम टेलिभिजनको जनता जान्न चाहन्छन्मा भने, ‘औपचारिक ढंगले चिठी दर्ज भएको छैन । कस्ले कसलाई दिइयो ?’ प्रक्रिया अनुसार चलेर चिठी प्राप्त भएपछि समय मिलाएर जान सकिने समेत बताए । आफू आफ्नो मन्त्रालयसँग सम्बन्धित विषयमा जहाँ जुनसुकै ठाउँमा प्रस्तुत हुन तयार भएको तर प्रक्रियासंगत तरिकाले हुनुपर्ने बताए ।

संसदको राज्य व्यवस्था समितिमा नेपाली सेनामा भ्रष्टाचार भएको भन्दै रक्षामन्त्री समेत रहेका उपप्रधानमन्त्री ईश्वर पोखरेल र प्रधानसेनापति पूर्णचन्द्र थापा अनुपस्थित नभएको भन्दै गत हप्ता आवाज उठिरहँदा पछिल्लो भनाई आएको हो । पोखरेलले राज्य व्यवस्था समितिमा बितण्डा मच्चाइएको आरोप लगाए ।

https://youtu.be/QvXXXuR9IOA

राज्य व्यवस्था समितिप्रति आफ्नो विश्वास र सम्मान भएपनि समितिको कार्यशैलीप्रति आलोचना गर्दै भने, ‘उहाँहरु बैठक बस्नुहोस् नबस्नुहोस् मतलब छैन । हाजिर हो भन्ने होइन समय मिलाउनुपर्छ । समय अनुकूल मिलाएर बोल्छु । राज्य व्यवस्थामा एकपटक गएको छु । बाटोमा हिंड्दा कहिले भनेर हुँदैन ।’