ओखलढुङ्गाको रमाइलो सामुदायिक रेडियोमा पत्रकारहरुले नै ठोके ताला

काठमाडौं, २० चैत । ओखलढुङ्गाको रमाइलो सामुदायिक रेडियोमा कार्यरत श्रमजीवी पत्रकारहरुले रेडियोमै तालाबन्दी गरेका छन् । लामो समयसम्म रेडियोले पारिश्रमिक नदिएपछि पत्रकारहरु आफै रेडियोमा तालाबन्दी गर्न वाध्य भएका हुन् ।

श्रमजीवी पत्रकारहरु पदमबहादुर कार्की, डम्बरबहादुर कार्की र शान्तिमाया कार्कीले रेडियोमा तालाबन्दी गरेका हुन् । श्रमजीवी पत्रकारहरुले श्रमको मुद्दा उठाएर गरेको यो आन्दोलनमा नेपाल पत्रकार महासंघ, श्रमजीवी हित प्रवद्र्धन समितिको पूर्ण साथ, सहयोग र समर्थन रहने संयोजक रामप्रसाद दाहालले बताएका छन् । “ओखलढुंगास्थित रमाइलो सामुदायिक रेडियोमा श्रमजीवी पत्रकारहरुले रमाइलो पक्कै गरेको होइनन्, श्रमको मूल्य खोजेका हुन्”, संयोजक दाहालले भनेका छन्, “प्रमुख जिल्ला अधिकारीसँग मैले समेत यो समस्या समाधानका लागि पहल गरिदिन अनुरोध गरेको धेरै दिन बित्यो । ‘हुन्छ’ भन्ने जवाफ मिलेको थियो । तर, शान्त र भद्र तरिकाले प्रशासनले श्रमजीवीका कुरा नसुन्दो रहेछ । मिडिया मालिकले सुन्ने कुरै भएन ।”

तालाबन्दी गर्ने श्रमजीवीहरुलाई प्रशासनले धम्क्याउन थालेको सुनिएको उल्लेख गर्दै संयोजक दाहालले श्रमजीवी पत्रकारहरुको श्रम मामिलामा उदार हुनुको साटोे उनीहरुलाई प्रताडित बनाउने कुकर्म प्रशासनले नगरोस् भन्दै चेतावनी दिएका छन् । अन्यथा यो आन्दोलनमा देशभरका श्रमजीवी पत्रकारहरु जोडिने र प्रशासनकै विरुद्ध खनिने चेतावनी उनको छ । संयोजक दाहालले ओखलढुंगाबाट उठेको यो आगो देशभर फैलिने खतरा औंल्याउँदै भनेका छन्, “यसलाई रोक्ने शक्ति केबल मिडिया मालिकहरुसँग छ– श्रमको सम्मानमार्फत ।”