ओली नेत्तृत्वको सरकारले गुमेको भूभाग फिर्ता ल्याउँछः एकनाथ ढकाल

नेकपा ऐमाले तथा नेपाल परिवार दलद्वारा संयुक्त उम्मेदवार भेटघाट तथा अन्तरक्रिया कार्यक्रम गरिएको छ । नेकपा एमालेको सहयोगमा समानुपातिक उम्मेदबार बनेका नेपाल परिवार दलका केन्द्रीय अध्यक्ष एकनाथ ढकालको प्रमुख आतिथ्यमा र नेकपा एमाले गोरखा जिल्ला अध्यक्ष प्रेम बहादुर गुरूङको सभाअध्यक्षता नेकपा एमाले जिल्ला पार्टी कार्यालय हलमा कार्यक्रम सम्पन्न भएको हो । प्रदेश नं १ झापाबाट नेकपा एमाले अध्यक्ष केपी ओलीसँगै सुरू भएको अध्यक्ष ढकालको चुनावी अभियान बागमती प्रदेश हुँदै मधेस प्रदेशको चुनावी सभालाई संम्बोधन गरेर गृह जिल्ला गोरखा पुगेको हो । अध्यक्ष एकनाथ ढकालले केपी ओलीको नेतृत्वमा राष्ट्रिय शक्ति निर्माण गर्न परिवार दल समेत लागि परेको साथै सम्पूर्ण नेपाली जनता मिलेर देशलाई दुर्घटना बाट बचाउन आग्रह गरे ।

साथै अहिलेको ५ दलिय सत्ता गठवन्धनसँग देशको आमूल परिवर्तन गर्ने विकासको कुनै पनि एजेण्डा नभएको र देशले कुनै पनि प्रकारको फाइदा हासिल गर्न नसक्ने र पहिलेको परिस्थितिको निरन्तरता हुने भएकोले त्यसको क्रमभङ्गता गर्दै एमाले अध्यक्ष केपी ओली नेपाली राजनितीको श्रीखण्ड भएकोले प्रधानमन्त्रीको रूपमा नेपाल परिवार दल साथै केपि ओली नेतृत्व गठबन्धनले अगाडि सारेको जानकारी दिदै अब बन्ने एमाले नेत्तृत्वको सरकारले गुमेको भु–भाग कालापानी र लिम्पियाधुरामा राष्ट्रिय झण्डा फैलाउन सक्ने ठोकुवा गरे ।

अध्यक्ष ढकालले गोरखा जिल्लामा अब नयाँ नेतृत्वको लागि बिकल्प दिनुपर्ने समय आएकाले तयार हुन अनुरोध गर्दै गोरखाले बिकासवादी नेतालाई तिरस्कार गरेको र बिकासको सिन्को नभाचेको नेतालाई फुलमालाले पुरस्कृत गरेको गुनासो गरे ।

नेपाल परिवार दलको आह्वानः सुर्यमा मतदान, ’समृद्व नेपाल र सुखी नेपाली ः सूर्यमा भोट यसपाली ’ भन्ने नारा सहित नेपाल परिवार दल देशभरि चुनावी अभियानमा लागेको दलका महामन्त्री प्रकाश बाबू थापाले जानकारी दिए ।