कमल थापाले भने, ‘पार्टीको पराजयमा म नैतिक जिम्मेवारी लिन्छुु’

काठमाडौं, पुस १९ । राष्ट्रिय प्रजातन्त्र पार्टीका अध्यक्ष कमल थापाले निर्वाचनमा भएको पराजयको जिम्मेवारी लिएका छन् । बानेश्वरस्थित अनमोल क्याटरिङ्गमा बुधबारदेखि बसेको केन्द्रीय कार्यसमितिको बैठकमा अध्यक्ष थापाले निर्वाचनमा भएको पराजयको नैतिक जिम्मेवारी लिएका हुन् ।

थापाले भने, ‘पार्टीको पराजयमा म नैतिक जिम्मेवारी लिन्छु ।’ अध्यक्ष थापाले राजनीतिक प्रतिवेदन पेश गर्दै पार्टीको कार्यनीतिमा भएको कमजोरीका कारण हार बेहोर्नु परेको बताए । बैठकमा थापाले समसामयिक राजनीतिक परिस्थितिको विश्लेषण र भावी कार्यदिशा सम्बन्धी राजनीतिक प्रतिवेदन पेश गरेका छन् ।

अध्यक्षको प्रतिवेदनमा छलफल भइरहेको पार्टीका सह–प्रवक्ता मोहन श्रेष्ठले जानकारी दिए । प्रतिनिधिसभा र प्रदेशसभा निर्वाचनको भएको पराजयको विषयमा बैठकमा गम्भिर समिक्षा हुने उनले बताए ।

राप्रपा २०७० सालको दोस्रो संविधान सभाको निर्वाचनमा समानुपातिकबाट २५ सिट जितेर चौथो शक्तिको रुपमा स्थापित भएको भने गत मंसिर १० र २१ गते भएको प्रतिनिधिसभातर्फ १ सिट मात्र जितेको छ भने समानुपातिकतर्फ प्रदेश सभामा ३ सिट जितेको छ ।