गंगामायालाई बचाउन आयोगले गर्यो आग्रह

काठमाडौँ, २२ जेठ – राष्ट्रिय मानवअधिकार आयोगले वीर अस्पतालमा अनसनमा बसेकी गंगामायालाई बचाउन आग्रह गरेको छ । छोरा कृष्णप्रसाद अधिकारीको हत्याको छानवीन र दोषीमाथि कानूनी सजायको माग गर्दै लामो समयदेखि वीर अस्पतालमा उपचाररत गंगामायाको जीवनरक्षा गर्न आग्रह गरेको हो ।

आयोगका सचिव वेद भट्टराईद्धारा जारी प्रेस विज्ञप्तिमा गंगामायाको स्वास्थ्य अवस्थाप्रति संवेदनशील भई जीवनरक्षाका लागि तत्काल आवश्यक पहल गर्न आयोगले सम्बन्धित सबै पक्ष एवं निकायलाई आह्वान गरिएको छ ।

छोराको न्यायका  यही जेठ १५ गतेदेखि पुनः अनसन बसेकी र पटक पटकको अनसनका कारण निजको स्वास्थ्य अवस्था अत्यन्त कमजोर र नाजुक बन्दै गएको बताइएको छ ।

सरकार र सम्बन्धित निकायसमेतलाई पटक-पटक ध्यानाकर्षण गराउँदा त्यसतर्फ कुनै सुनुवाइ नहुनु तथा न्याय छिटोछरितो र सर्वसुलभ हुनुपर्ने मूल्य मान्यताको परिपालना नहुँदा न्यायिक संयन्त्रप्रतिको जनआस्थामा समेत प्रश्न खडा हुने गरेको आयोगले जनाएको छ ।