जनप्रतिनिधिलाई जिल्लाको नक्सा रङ्गिन बनाउन पत्रकारको आग्रह

खोटाङ, पुस ४ – प्रदेशसभा र प्रतिनिधिसभा सदस्यमा विजयी जनप्रतिनिधिलाई खोटाङका पत्रकारहरुले जिल्लाको सादा नक्सा प्रदान गरेका छन् । प्रेस चौतारी र प्रेस सेन्टर नेपालमा आवद्ध पत्रकारहरुले प्रतिनिधिसभा सदस्यमा विजयी विशाल भट्टराई, प्रदेशसभा (क) मा विजयी राजन राई र प्रदेशसभा (ख) मा विजयी रामकुमार राईलाई मंगलबार जिल्लाको सादा नक्सा अंकित बधाई तथा शुभकामना–पत्र प्रदान गरेका हुन् ।

विकासको रंग भर्दै जिल्लाको समृद्धिमा काम गर्नका लागि आह्वान स्वरुप प्रतिनिधिसभा सदस्य विशाललाई प्रेस सेन्टरका अध्यक्ष तामाङ, प्रदेशसभा (क) का सदस्य राजनलाई प्रेस चौतारीका जिल्ला अध्यक्ष एवं केन्द्रीय सदस्य हरिबोल आचार्य र प्रदेशसभा (ख) का रामकुमारलाई प्रेस सेन्टरका केन्द्रीय सदस्य भीम राईले खोटाङको सादा नक्सा अंकित बधाई तथा शुभकामना–पत्र हस्तान्तरण गरेका हुन् ।

खोटाङको भौतिक, आर्थिक र सामाजिक परिवर्तनको रङ्ग भर्नका लागि प्रदेशसभा तथा प्रतिनिधिसभा सदस्यमा विजयी उम्मेदवारलाई जिल्लाको सादा नक्सा प्रदान गरिएको प्रेस सेन्टरका जिल्ला अध्यक्ष तामाङले बताउनुभयो ।

जनप्रतिनिधिका रुपमा निर्वाचित हुनुभएकोमा बधाई एवं सफल कार्यकालका लागि शुभकामना व्यक्त गर्दछौँ,’ बधाई तथा शुभकामना–पत्रमा भनिएको छ, ‘खोटाङ जिल्लाको भाग्य र भविष्य निर्माण गर्दै विकास र समृद्धिको रङ्ग भर्न यहाँलाई जिल्लाको सादा नक्सा प्रदान गरिएको छ ।’

सादा नक्सा अंकित बधाई तथा शुभकामना–पत्र बुझ्दै जनप्रतिनिधिले जिल्लाको समृद्धिको रंग भर्नका लागि अवसरलाई सदुपयोग गर्ने प्रतिवद्धता जनाएका छन् ।