यो सरकार दलाल राष्ट्रघातीको हो ?’: गृहमन्त्री रामबहादुर थापा

काठमाडाै, २० असार । गृहमन्त्री रामबहादुर थापा बादलले अनशनका भरमा स्वास्थ्य नीति बनाउन खोज्नु अधिनायकवादी शैली भएको बताएका छन् ।

बुधबार संसदलाई सम्बोधन गर्दै गृहमन्त्री बादलले डा. गोविन्द केसीलाई गिरफ्तार नगरिएको र विरोध गर्न रोक नलगाएको बताए । तर, लोकतन्त्रका नाममा जहाँ पनि विरोध प्रदर्शन गर्न र अनशन बस्न नपाइने बताए । उनले भने, ‘विरोध प्रदर्शन गर्ने अधिकारलाई कुण्ठित गरिएको छैन । अनसन बस्न पाइन्छ ।’

उनले डा. गोविन्द केसीले अस्पतालमा अनसन बस्नुलाई लोकतन्त्र भन्न नमिल्ने बताए । ‘अति संवेदनशील बस्तुमा अस्पताल चोक संवेदनशील ठाउँमा विरोध गर्दा अस्तव्यस्त हुन्छ । अन्त बस्न सक्नुहुन्न ? त्यसैले त्यो गर्नु पनि हामी लोकतन्त्र भन्दैनौं’ गृहमन्त्री थापाले भने ।

यदि सरकार प्रतिगामी भयो भने विद्रोह गर्नुपर्ने भन्दै नेकपाका नेता समेत रहेका गृहमन्त्री बादलले प्रश्न गरे, ‘अहिले विद्रोह गर्ने समय हो ? यो सरकार दलाल राष्ट्रघातीको हो ?’

उनले अहिले भइरहेको आन्दोलन विद्रोह नभई प्रतिविद्रोह भन्दै यो लोकतन्त्र विरोधी भएको जिकिर गरे ।