जलजलाको मृगौला उपचार खर्च जुटाउन लाइभ म्यूजिक गरिँदै

भरतपुर, माघ २५ । भरतपुरमा गायिका जलजला परियारको उपचार सहयोगार्थ ‘लाइभ म्युजिक फर जलजला’ कार्यक्रम गरिने भएको छ । उनको दुवै मृगौलाले काम गर्न छाडेपछि काठमाडौंस्थित टिचिङ अस्पतालमा उपचारत छिन् । जलजला नेपाल तारा सिजन–३ मा प्रतिस्पर्धी थिइन् ।

उनले बाटो मुनिको फुल–२ चलचित्रमा केहि कदम बोलको गीत, एकोहोरो प्रेम एल्बममा समावेश ढुङगाको मन बोलको गीत चर्चामा छन् । उनी विभिन्न रियालीटि सोमा दर्शकको रोजाईमा पर्दै आएकी थिइन् । उनी सबैको मन छुने गीत गाउने सपना पुरा गर्न दिनरात संगीत साधनामा जुटेकी थिइन् ।

भरतपुरस्थित क्यान्सर अस्पतालको अडेटेरियन हलमा यहि २७ गते शनिबार विशेष सांगीतिक कार्यक्रम हुन लागेको हो । सो कार्यक्रममार्फत संकलित रकम जलजलाको उपचारमा सहयोग गर्ने लक्ष्य लिइएको छ ।

बेटर चितवन, लियो क्लब अफ नारायणगढ चित्रवन, मिस एसईई स्टार चितवन समूहले संयुक्त रुपमा कार्यक्रम आयोजना गरेका हुन् । इन्स्पायर एजुकेसन कन्सल्टेन्सीले कार्यक्रमको मुख्य प्रायोजन गरेको छ ।

लाइभ म्यूजिक कार्यक्रममा राष्ट्रिय तथा स्थानीय एक दर्जन बढी कलाकारले आ–आफ्नो विशेष प्रस्तुती दिनेछन् । एञ्जिला रेग्मी, सुजता पाण्डे, अप्सरा अली, विद्या तिवारी, भुुवन प्यासी, रोन्जाइ, महेन्द्र बराललगायतका गायक गायिकासहित एनएमजी ब्याण्डलगायतले प्रस्तुती राख्ने कार्यक्रम संयोजक निकेश बरालले जानकारी दिए ।

दिउँसो ३ बजेदेखि कार्यक्रम सुरु हुनेछ । २ सय, ५ सय र १ हजार रुपैयाँ बराबरका टिकटको व्यवस्था गरिएको छ ।