जिते दिलबहादुरले मृत्युदण्ड, एकै दिन १५ लाख हस्तान्तरण, ऊर्जामन्त्री र पूर्वसभामुखले दिए १ लाख

काठमाडौं, १८ साउन । साउदी अरबको जेलमा रहेका दिलबहादुर घर्तीमगरले मृत्युदण्डलाई जितेका छन् । साउदी अरबको अदालतबाट मृत्युदण्डको फैसला सुनाइएका रोल्पाका दिलबहादुर घर्तीमगरलाई बचाउन संसारभरका नेपालीहरुले ब्लडमनी जुटाउन सफल भएपछि उनले मृत्युदण्डलाई जितेका हुन् ।

दिलबहादुर घर्तीमगरको जीवन रक्षाका लागि एकै दिन १ लाख भन्दा बढी सहयोग रकम हस्तान्तरण भएको छ । ऊर्जा तथा सिंचाई मन्त्री वर्षमान पुन “अनन्त” र पूर्वसभामुख ओनसरी घर्तीमगरले दिलबहादुरको जीवन रक्षाका लागि संयुक्त रुपमा १ लाख सहयोग हस्तान्तरण गरेका छन् ।

ऊर्जामन्त्री पुन र पूर्वसभामुख घर्तीमगरबाट १ लाख, वाइसिएल जिल्ला समिति रोल्पाको पहलमा संकलित ५ लाख ७८ हजार, मगर संघ साउदी अरबबाट संकलित ७ लाख ५० हजार, प्रदेश सांसद लालकुमारी पुन “सुशीला”बाट ५० हजार र मगर संघ कतारबाट २५ हजार रुपैयाँ बिहीबार “दिलबहादुर घर्ती बचाउनको लागि ब्लडमनी संकलन अभियान–२०७५” मूल समितिलाई हस्तान्तरण गरिएको छ ।

वाइसिएल जिल्ला समिति रोल्पाको पहलमा संकलित ५ लाख ७८ हजार ऊर्जामन्त्री पुनले मूल समितिलाई हस्तान्तरण गरेका हुन् । सोही कार्यक्रममा ऊर्जामन्त्री पुन र पूर्वसभामुख घर्तीमगरले संयुक्त रुपमा मूल समितिलाई १ लाख रुपैयाँ हस्तान्तरण गरे । कार्यक्रममा तीन नं. प्रदेश सांसद सुशीलाले ५० हजार रुपैयाँ हस्तान्तरण गरेकी थिइन् ।

बिहीबारै मगर संघ साउदी अरबको पहलमा संकलित ७ लाख ५० हजार रुपैयाँ नेपाल मगर संघले मूल समितिलाई हस्तान्तरण गरेको छ । मगर संघका अध्यक्ष नवीन रोकामगरले मूल समितिलाई हस्तान्तरण गरेका हुन् । मगर संघको पहलमा साउदी अरबमा क्रियाशील एनए मिडिया प्रालि, नेपाल ट्रेड यूनियन महासंघ (जिफन्ट), प्रवासी मिलन एकता समाज, तमु धीं र काभ्रे सेवा समाज लगायतले सो रकम संकलन गरेका हुन् । साउदी अरबबाट विभिन्न संघसंस्थाहरुले संकलन गरेका साढे ८ लाख रकम मूल समितिलाई हस्तान्तरण गरिसकेका छन् ।

रोल्पा नगरपालिका–१०, रोल्पा घर भएका दिलबहादुर विगत दुई वर्षदेखि साउदीको जेलमा छन् । उनले चलाएको ट्रकमा साउदी नागरिकले चलाइरहेको कार ठोक्किन आउँदा साउदी नागरिकको मृत्यु भएपछि अदालतले दिलबहादुरको ७५ प्रतिशत गल्ती देखाई मृतकका परिवारलाई २ लाख २५ हजार रियाल करिब ६५ लाख रुपैयाँ क्षतिपूर्ति दिन फैसला गरेको छ । साउदीस्थित नेपाली दूतावासले गरेको पुनरावेदनमा अदालतले गत चैत २२ गते पुरानै फैसलालाई सदर गरेपछि दिलबहादुरले मृतकका परिवारलाई ६५ लाख तिर्नैपर्ने भएको हो ।