झापामा पार्कका लागि नगरपालिकाले दियो कर छुट

झापा, १३ फागुन – झापा दमक–१० मा ‘क्लिन ग्रीन इन्डस्ट्रियल पार्क’का बनाउनका लागि लागि जग्गा अधिग्रहण सुरु गरिएको छ । पार्कका लागि ३ सय ६६ बिघा जमिन अधिग्रहणको प्रक्रिया सुरु गरिएको हो ।

फागुन ६ गते जिल्ला प्रशासन कार्यालय झापामा भएको बैठकले चार किल्लामा पर्ने जमिन अधिग्रहणका लागि सार्वजनिक सूचना जारी गर्ने निर्णयपछि काम शुरु भएको हो । दमकमा बन्न लागेको पार्क करिब २ हजार १ सय बिघामा हुँदैछ ।

नगरपालिकाका प्रमुख रोमनाथ ओलीका अनुसार औद्योगीकरणका लागि कर छुटको दिने निर्णय गरिसकेको छ । स्थानीय सरकारले केही राजश्व गुमाएर पनि औद्योगिकरणका लागि फाइदा दिन सक्ने बताइएको छ ।

पार्कका लागि ९ सय ४२ बिघा जमिन औद्योगिक क्षेत्र व्यवस्थापन लिमिटेडको नाममा आइसकेको छ । पार्कका लागि चार किल्लामा पर्ने २ हजार १ सय बिघा र्पुयाउन बाँकी रहेको जमिन गौरादह र कमल गाउँपालिकाको खोला क्षेत्रको जमिनसमेत व्यवस्था गर्ने कार्य भइरहेको दमक नगरपालिकाले जनाएको छ ।

दमक नगरपालिकाले सो औद्योगिक क्षेत्रमा विदेशी लगानी आकर्षित गर्नका लागि कम्तीमा १० वर्षसम्म कुनै उद्योगलाई कर नलिने नगरसभाबाट निर्णय गरिसकेको छ । औद्योगिक पार्क स्थापना हुने दमक–१० का वडाध्यक्ष बोधराज न्यौपानेले पार्क निर्माणको प्रक्रियाले थप गति लिएपछि स्थानीयमा पनि उत्साह बढेको बताए । ‘बृहत् योजना भएकाले कार्यान्वयनमा ढिलाई हुने हो कि भन्ने शंका थियो’, उनले भने, ‘तर जग्गा अधिग्रहणको प्रक्रियाले धेरै आशा बढाएको छ ।’ औद्योगिक क्षेत्र व्यवस्थापन लिमिटेडका अनुसार यसको कार्यान्वयनको गति बढाउन दमकमानै कार्यालय स्थापनाको तयारी छ ।

लिमिटेडका सूचना अधिकारी दीलिपकुमार श्रेष्ठले स्थानीय कार्यसम्पादनका लागि दमकमा नै कार्यालय स्थापना गर्ने तयारी भएको हो । औद्योगिक पार्क व्यवस्थापन समितिका अध्यक्ष गोविन्द थापाका अनुसार चीनको वान बेल्ट वान रोड अवधारणा अनुसार दमकमा चिनियाँ लगानी भित्रिदैछ ।