डडेल्धुरामा काँग्रेसलाई जिताउनस्, विकास गरेर राजधानी ल्याउँछु : देउवा

प्रधानमन्त्री तथा नेपाली काँग्रेसका सभापति शेरबहादुर देउवाले डडेल्धुराको विकासका लागि काँग्रेसका उम्मेदवार जिताउनुको विकल्प नभएको बताएका छन् । मंगलबार डडेल्धुराको अमरगढीमा आयोजित चुनावी आमसभालाई सम्बोधन गर्दै देउवाले काँग्रेस उम्मेदवारलाई जिताए डडेल्धुरामा विकास गरेर प्रदेश राजधानी समेत बनाउने बताए ।

उनले भने, ‘म प्रधानमन्त्री भएको छु । सबैभन्दा बढी बजेट यहाँ राख्ने छु । पूर्वाधार बन्यो भने भोलि यहाँ सुदूरपश्चिमको राजधानी सार्न सकिन्छ ।’ भौतिक संरचना नभएकाले प्रदेश राजधानी डडेल्धुरामा ल्याउन नसकिएको भन्दै भोलि ल्याउन सकिने बताए । विपक्षीले डडेल्धुरालाई राजधानी बनाउछु भनेर आश्वासन मात्र दिएको आफूमाथि लागेको आरोपको देउवाले खण्डन गरे । ‘पालमुनि कही सभासदको हल बन्छ रु यति त बुझ्नु पर्यो नि रु यस्ता झुटा बोल्ने मान्छेलाई मैले के भन्ने रु यस्ता फटाहसँग के भन्ने मैले रु,’ देउवा आक्रोशित सुनिए ।

देउवाले अब छिट्टै डडेल्धुरामा मेडिकल कलेज, एयरपोर्ट र बसपार्क बनाइने प्रतिबद्धता व्यक्त गरे । ‘डडेल्धुरामा मेडिकल कलेज बन्छ । डडेल्धुराको अजयमेरू गाउँपालिका– १ पुइलेकमा एयरपोर्ट बनाउन अध्ययन भइसकेको छ । अब एयरपोर्ट बन्छ । डडेल्धुरामा राम्रो बसपार्क बनाउने छु,’ देउवाले भने । डडेल्धुराको विकास हुँदा सुदूरपश्चिमका सबै जिल्लाका मानिसले सुविधा पाउने उनको भनाइ छ । ‘यहाँ मेडिकल कलेज, एयरपोर्ट बनेपछि राजधानी पनि यहाँ आउन सक्छ । काँग्रेसका सबै उम्मेदवारलाई जिताउनु भयो भने यी सबै कुरा पुरा गर्ने छु । गरेन भने मैले बदमास भन्नु होला,’ उनी भन्छन् ।

प्रधानमन्त्री देउवाले पश्चिम सेती जलविद्युत आयोजना निर्माणका लागि अग्रसरता बढाएको जानकारी दिए । ‘पश्चिम सेती बनाउनेबारे मैले इन्जिनियर गोविन्द भट्टलाई अध्ययन गर्न पठाएको थिएँ । हामी आफैले बनाउन सकिन्छ कि सकिँदैन भनेको थिएँ । उहाँले नेपालले आफ्नो लगानीमा बनाउन सक्ने अवस्था छैन भन्नुभयो,’ उनले भने । उक्त आयोजना निर्माणको जिम्मा विदेशी कम्पनीलाई बनाउन दिनुपर्ने भन्दै भारतीय कम्पनीसँग सम्झौता लागि प्रयास गरिरहेको उनको भनाइ छ ।

देउवाले भने, ‘भारतीय कम्पनीलाई निर्माणको जिम्मा दिँदा बिजुली पनि भारतले किन्ने भएकाले भारतलाई ल्याउनुपर्ने हुन्छ । जलविद्युत आयोजना निर्माण गर्ने भारतमा दुई वटा कम्पनी छ । राम्रो कम्पनीलाई जिम्मा दिने मेरो योजना छ ।’ भारतीय प्रधानमन्त्री नरेन्द्र मोदी बुद्धजयन्तीमा लुम्बिनी आउन लागेको भन्दै सोही क्रममा सम्झौता गर्ने तयारी भइरहेको देउवाले जानकारी दिए । ‘भारतीय प्रधानमन्त्री मोदीजीसँग मेरो भेट हुँदैछ । उहाँ लुम्बिनीमा आउँदै हुनुहुन्छ । नेपाललाई फाइदा हुने गरेर त्यही हस्ताक्षर गरेर भारतीय राम्रो कम्पनीलाई बनाउन दिन्छु,’ उनले भने ।