डा. गोविन्द केसीले दिए फेरि अनसन बस्ने चेतावनी, किन होला ?

काठमाडौं, १६ फागुन । डा. गोविन्द केसीले फेरि पनि अनसन बस्ने चेतावनी दिएका छन् । प्रधानन्यायाधीश गोपाल पराजुलीमाथि महाअभियोग लगाउन माग गर्दै नभए आमरण अनसन बस्ने चेतावनी दिएका हुन् ।

पराजुलीविरुद्ध आन्दोलन गर्दै आएका डा. केसी र अभिवक्ता ओमप्रकाश अर्यालले शैक्षिक, चारित्रिक र स्थानान्तरण प्रमाणपत्रको सूचना माग गर्दै सर्वोच्चमा निवेदन दिएका थिए । तर, सर्वोच्चले सूचना नदिने व्यहोरासहितको पत्र थमाउन खोजेको डा. गोविन्द केसीले आरोप लगाए ।

डा. केसीले भने, “यसले हामीले माग गरेको उहाँको प्रवेशिकाको चारित्रिक प्रमाणपत्र फर्जी भएको हाम्रो आशंकालाई पुष्टि हुने आधार थपिएको छ । यस सम्बन्धमा हामीले उपयुक्त समयमा थप कदम चाल्ने छौं ।”

डा. केसीले प्रधानन्यायाधीश गोपाल पराजुलीले पदको दुरुपयोग गरी भ्रष्टाचार र माफियागिरी गरेको ठोकुवा गरेका छन् । प्रधानन्यायाधीश पराजुलीलाई पदमुक्त गराई छाड्ने डा. केसीको दृढता देखाए ।

पराजुलीले राजीनामा दिनुपर्ने नभए महाअभियोग लगाउनुपर्ने डा. केसीको माग छ । नभए सत्याग्रहसहितका कडा कदम चाल्ने डा. केसीले चेतावनी दिए ।