तिज गीतमा धम्की आएपछि गायिका सोफिया थापाले दिइन् प्रहरीमा उजुरी

गायिका सोफिया थापाले आफ्नो गीतलाई लिएर धम्की आएको भन्दै प्रहरीमा उजुरी गरेकी छन् । उनको सोमवार सार्वजनिक भएको गीत ‘तिज गीत’ विवादमा परेको थियो ।

विभिन्न व्यक्तिहरुबाट फोन र म्यासेजमा धम्की आइरहेको उनले बताइन् । गीत नहटाए भौतिक आक्रमण गर्ने चेतावनीसमेत आएपछि उनले बुटबल र काठमाडौं प्रहरीमा लिखित उजुरी दिएकी हुन् ।

‘हिजो गीत अपलोड भएदेखि नै लगातार चेतावनी र धम्की आइरहेको छ । हिन्दूवादीहरु संगठितरुपमा नै ममाथि खनिएका छन् । मैले आफ्नो ज्यानको सुरक्षा गरिपाउँ भन्दै उजुरी दिएको छु,’ थापाले भनिन् ।

सोफियाले ‘यसपालीको तिज, नो व्रत प्लिज‘’ बोलको गीत आफ्नै रचना र संगीतमा गाएकी हुन् । उक्त गीतले तिजको मर्म र हिन्दू महिलाहरुको आस्थामा ठेस पु¥याएको भन्दै आलोचना भएको छ । सोफियाले चाहिँ आफूले गीतमार्फत लैंगिक चेतना जगाउने उद्देश्य मात्रै राखेको बताइन् । आफूले कुनै गल्ति नगरेको भन्दै उनले कसैको दवावमा परेर गीत यूट्यूटबाट नहटाउने अडान व्यक्त गरिन् ।

विश्व हिन्दू युवा संघ अन्तर्राष्ट्रिय समिति तथा हिन्दु जागरण नेपालले सोफियालाई सो गीत हटाउन आग्रह गरेको थियो ।