देशको अर्थतन्त्र सुधार्न प्रधानमन्त्री इमरानले बेचे नवाज शरिफका भैंसी

बीबीसी । पाकिस्तान सरकारले पूर्व प्रधानमन्त्री नवाज शरिफले पालेका आठ भैंसीलाई लिलामीमा बेचेर पैसा आफ्नो ढुकुटीमा जम्मा गरेको छ । केही दिन पहिला प्रधानमन्त्री निवासका कार पनि लिलामी गरेर केही रकम ढुकुटीमा जम्मा गरेको थियो ।

यी भैंसी प्रधानमन्त्री निवासमा राखिएको थियो, जहाँ नवाज शरिफ र उनका परिवार बस्थे । तर पाकिस्तानका नयाँ प्रधानमन्त्री इमरान खानले खर्चमा कटौती गर्ने निर्णयपछि ती भैँसी लिलामीमा बेचिएको बीबीसीले जनाएको छ ।

इमरान खानले चुनावमा जित्नुको पछाडिको मुख्य कारण उनको भ्रष्टाचार अन्त्य गर्ने प्रतिबद्धताले मुख्य भूमिका निर्वाह गरेको थियो। प्रधानमन्त्रीको पदमा पुगेपछि उनले खर्च कटौती गर्ने धेरै निर्णय गरिसकेका छन् । तर आलोचकले भने उनको यो कदमलाई देखावती भन्दै आएका छन् ।

गत महिना मात्रै के थाहा भएको थियो भने इमरान खान आफ्नो घरबाट १५ किलोमिटर टाढा आफ्नो कार्यालय जानकालागि हेलिकप्टरको प्रयोग गर्दा रहेछन् । त्यसपछि उनको निकै आलोचना भएको थियो ।

भैंसीको लिलामीबाट प्राप्त १३ लाख ७८ हजार रुपैयाँ राष्ट्रिय ढुकुटीमा जम्मा गरिएको छ । यसअघि बुलेटप्रुफ कारको लिलामीबाट आएको ४ करोड ३५ लाख पनि ढुकुटीमा जम्मा गराइएको थियो ।
नवाज शरिफका समर्थकहरुमा यी भैंसीप्रति खास लगाव छ।

हसन लतिफ नाम गरेका व्यक्तिले यी भैंसी किनेका हुन्। उनीसँग एउटा डेरी फार्म छ र उनी यी भैंसी किन्ने मौका गुमाउन चाहँदैन थिए । उनले बीबीसी उर्दूसँग भने–मसँग सयभन्दा धेरै भैंसी छन् । तर म आफ्ना नेताको एक भैंसी किन्न चाहन्थे । यो मेरो इज्जतको पनि विषय हो । यदि मौका मिल्यो भने म त्यो भैंसीलाई फेरि शरिफ साहबलाई नै फिर्ता गर्न चाहन्छु ।’

प्रधानमन्त्री कार्यालयका एक कर्मचारीका अनुसार भैंसीको लिलामीबाट आशा गरेभन्दा धेरै कमाइ भएको बताए । तर, यी भैंसी लिलामीबाट सबै जना खुशी भएका भने छैनन् ।

रावलपिंडीबाट आएका एक ग्राहकले भने–यस्ता भैंसी बजारमा त्यो भन्दा आधा मूल्यमा नै पाइन्छ । यो भैंसीको मूल्य धेरै भयो। मलाइ त यो भैंसी किन्ने ग्राहक पनि सक्कली लागेको छैन ।’ तर धेरै मूल्य सरकारकालागि भने राम्रो समाचार हो । किनभने पाकिस्तानी सरकार गम्भीर आर्थिक चुनौतीको सामना गरिरहेको छ । यद्यपी यो लिलामी आर्थिक समस्याको सामना गर्न उँटमा मुखमा जिरा जस्तै हो ।