नमिता सुनिता नीरा हत्याकाण्ड राजतन्त्रले दवायाे निर्मला पन्त काण्ड कस्ले दबाउदैछ ?

काठमाडाै, २२ असाेज । पंचायतकालमा पोखरामा भएको नमिता सुनिता र नीरा बलात्कार तथा हत्याकाण्ड एक दर्दनाक र चरम आतंकपूर्ण हत्याकाण्ड थियो । यसलाई तात्कालिन पञ्चायती राजतन्त्रले सत्ताको दुरुपयोग गरी दबाएको थियो । त्योबेला चलेको चर्चाअनुसार राजपरिवार निकटका मानिसहरु नै यस बलात्कार र हत्याकाण्डका अपराधीहरु थिए । जसले गर्दा यसलाई त्यो बेलाको दरबार र त्यसका भाट मतियारहरुले कुटिल तरिकाले दवाए । पछि ज्ञानेन्द्रले सत्ता हातमा लिएपछि यसको फाइललाई प्रहरीले बन्द ग-यो । त्यसबेला पोखराको सिडिओ रहेका र पछि अञ्चलाधिश भएका सूर्यबहादूर सेन ओलीलाई माओवादीका ठुला नेताहरुले स्वागत सम्मानसहित प्रवेश गराए तथा सांसद पनि बनाए । तर, त्यस बलात्कार र हत्याकाण्डबारे उनले पनि अहिले सम्म मुख खोलेनन् र माओवादीका ठुला नेताहरुले यसलाई मतलब पनि गरेनन् ।

अहिले निर्मला पन्त बलात्कार तथा हत्याकाण्डलाई पनि नमिता सुनिता नीरा हत्याकाण्ड जसरी नै दबाउने षडयन्त्र भैरहेको जनसमुदायको अनुमान छ । यसका विरुद्ध आक्रोश छाइरहेकोछ । तर, सरकारले समयमै सही तरिकाले यसको अनुसन्धान गर्न गराउन तथा अपराधीहरुलाई हदैसम्म सजाय दिलाई पीडितलाई न्याय दिलाउन सकिरहेको छैन । अहिले सरकारले वनाएको उच्चस्तरिय छानवीन समितिको प्रतिवेदन पनि सार्वजनिक भैसकेकोछ । यसले अपराधीको पहिचान गर्न सकेको छैन, तर यस घटनालाई सामुहिक बलात्कार र त्यसपछि भएको हत्याकाण्ड हो भन्ने तर्फ इंगित गरेको छ र अनुसन्धानको दायरा फराकिलो बनाउन पर्ने सुझाव दिएको छ ।दृष्टि साप्ताहिक का अनुसार  त्यस प्रतिवेदन तयार गर्नेहरुका बिच नै मत बाझिएको पनि देखिएको छ । एक सदस्यले हत्याकाण्डको बेला प्रमाण नष्ट गर्ने प्रहरी अधिकारीहरुलाई हत्याकाण्डको मतियारको रुपमा नै मुद्दा चलाई कारबाही गर्नुपर्ने राय दिएको छ भने अरुले उनीहरु माथि केवल विभागीय कारवाहीको मात्र सुझाव दिएको छ ।

जनसमुदायमा भने प्रमाणहरु नष्ट गर्ने, लुकाउने तथा अर्का निरपराध व्यक्ति खडा गर्न खोज्ने प्रहरी अधिकारीहरुले नै मुख्य अपराधीहरु छिपाएको आशंका गरिरहेका छन् । यस्तो स्थितिमा जनसमुदायको माग भनेको प्रमाण नष्ट गर्ने अधिकारीहरु माथि मतियार कै रुपमा मुद्दा चलाइनु पर्ने रहेको छ । अरुले प्रमाण नष्ट गर्न लाग्दा रोक्न पर्ने प्रहरी अधिकारीहरुले नै प्रमाण नष्ट गर्ने कुरा केवल लापरवाही मात्रै होइन भन्ने मत जनसमुदायमा व्याप्त छ । यस तथ्यतर्फ गृहमन्त्रालयको ध्यान जानुपर्दछ र  समयमै सही पाइला चाल्नु पर्दछ । यसले मात्रै हत्याकाण्डका अपराधीहरुसम्म सरकार पुग्न सक्दछ र जनआक्रोशलाई पनि सम्बोधन गर्न सकिने हुन्छ ।