नयाँ वर्ष मनाउने क्रममा पाँचको मृत्यु

काठमाडौँ, २ वैशाख। नयाँ वर्ष २०७५ सालको पहिलो दिन शनिबार देशका विभिन्न ठाउँमा डुबेर पाँच जनाको मृत्यु भएको छ । पाल्पाको रानीमहलमा नयाँ वर्ष मनाउन गएका दुई युवक कालीगण्डकी नदीमा शनिबार बेपत्ता भए । बगनासकाली गाउँपालिका–८ रानीमहल नजिकैको कालीगण्डकी नदीमा बन्दै गरेको पुलनिर पौडी खेल्ने क्रममा ऋदिकोट गाउँपालिका–३ हाथुकका १८ वर्षीय संगम कार्की र सोही स्थानका १८ वर्षे आयुश खनाल बेपत्ता भएका हुन् ।

त्यस्तै कपिलबस्तुको बाणगंगा नगरपालिका वडा नम्बर ९ भर्लावासको मुसिवाङ पनि नायँ वर्ष मनाउन गएका एक युवकको डुबेर मृत्यु भयो । बाँधमा पौडी खेल्ने क्रममा डुबेर अर्घाखाँची घर भई हाल कपिलबस्तुको वाणगंगा नगरपालिका वडा नम्बर ८ बोडगाउँ बस्दै आएका १९ वर्षीय राजन भुसालको मृत्यु भएको इलाका प्रहरी कार्यालय पिपराले जनाएको छ । बाणगंगा बहुमुखी क्याम्पस वोडगाउँमा कक्षा १२ मा अध्ययनरत उनी नयाँ वर्ष मनाउन साथीहरुसँग बाधमा पौडी खेल्न गएका थिए ।

यता सिन्धुपाल्चोकको ठूलोढुंगास्थित सुनकोशी नदीमा पौडी खेल्दा अर्का एक युवक बेपत्ता भए । नयाँ वर्षको उपलक्ष्यमा वनभोज खान गएका सुनकोसी गाउँपालिका–४ यमुनाडाँडा निवासी १८ वर्षीय रुपेश खड्कालाई पौडी खेल्ने क्रममा सुनकोशीले बगाएको जिल्ला प्रहरी कार्यालय सिन्धुपाल्चोकले जनाएको छ ।

त्यसैगरी मोरङ र चितवनमा पनि पोखरीमा डुबेर १/१ जनाको मृत्यु भएको छ । मोरङको रतुवामाई नगरपालिका–५ स्थित सुनवर्षी मन्दिरको पोखरीमा पौडी खेल्ने क्रममा डुबेर शनिबार साँझ सुनवर्षी नगरपालिका–२ बस्ने ५५ वर्षीय मग्ना मिँयाको मृत्यु भएको छ । वैशाख १ गते नयाँ वर्षको अवसरमा मन्दिरमा लागेको मेलामा गाएका मिँयालाई पोखरीमा डुबेर मृतावस्थामा भेटेपछि स्थानीयले प्रहरीलाई खबर गरेका थिए ।

चितवनको भरतपुर महानगरपालिका–१० स्थित पुजा फनपार्कमा रहेको पौडी पोखरीमा पौडी खेल्ने क्रममा डुबेर शनिबार एक जनाको मृत्यु भएको छ ।

भरतपुर वडा नम्बर १७ का २० वर्षीय कालु गुरुङको पानीमा डुबेर मृत्यु भएको प्रहरीले जनाएको छ । घटनाको अनुसन्धान भइरहेको प्रहरीले जनाएको छ ।