नेकपाको कार्यदलले भोलिबाट काम सुरु गर्ने

काठमाडौं, १४ पुस । नेपाल कम्युनिष्ट पार्टी नेकपाले गठन गरेको कार्यदलले भोलिबाट संगठनात्मक एकता र पार्टी एकीकरणको बाँकी कामको गृहकार्य सुरु गर्ने भएको छ ।

दुई सातासम्म बसेको स्थायी समितिको बैठकले पार्टी एकताको बाँकी काम टुङ्गाउन ९ सदस्यीय कार्यदल गठन गरेको थियो । कार्यदलले तयार बनाएको प्रतिवेदनका आधारमा तल्लो तहसम्मको पार्टी एकता प्रक्रिया टुङग्याउने नेकपाले जनाएको छ ।

तत्कालीन एमाले र माओवादी केन्द्रबीच गत जेठ ३ गते पार्टी एकता भएपनि तल्लो तहसम्म एकताको काम सकिएको छैन । पार्टी एकतापछि सचिवालय, स्थायी समिति, केन्द्रीय समिति र प्रदेश समिति मात्र गठन भएको छ । वडा तहदेखि जिल्ला तहसम्मको एकता प्रक्रिया टुङग्याउन बाँकी छ ।

भोलिबाट काम सुरु गरेर तोकिएको समयसीमा भित्रै सकेर सचिवालयलाई बुझाउने कार्यदल सदस्य वेदुराम भुषालले जानकारी दिनुभयो । पार्टी एकता भएको लामो समयसम्म पनि तल्लो तहको एकता प्रक्रिया नटुङ्गिएको प्रति नेकपाभित्र तिव्र असन्तुष्टि बढ्दै गएको छ ।