‘नेता जोगाउँदा कांग्रेस रित्तियो’

नेपालगन्ज : नेपाली कांग्रेसका प्रभावशाली नेता प्रकाशमान सिंहले पार्टीभन्दा  नेता जोगाउने कार्यले नेपाली कांग्रेस रित्तिएको बताए। प्रेस युनियन बाँकेले बुधबार नेपालगन्जमा आयोजना गरेको पत्रकार सम्मेलनमा सञ्चारकर्मीसँग कुरा गर्दै नेता सिंहले नेपाली कांग्रेसभित्र व्यक्ति जोगाउने प्रवृति हावी भएको बताए।

उनले कुनै व्यक्तिलाई जोगाउने प्रवृति हावी भएकै कारण नेपाली कांग्रेस इतिहासमै कमजोर सिद्ध भएको दाबी गरे। उनले संसदीय दलका नेता शेरबहादुर देउवाको लबमिच्याइले पार्टीको शाख नै गिरेको संकेत गरे। जबसम्म काम चलाउने शैली अन्त्य गर्न सकिँदैन तबसम्म पार्टी जोगाउन नसकिने उनले बताए।

नेपाली कांग्रेसका लागि नेताभन्दा पनि पार्टीलाई जोगाउनुपर्ने अहिले प्रमुख खाँचो रहेको बताए। ‘कांग्रेसको सबभन्दा ठूलो चुनौती भनेको पार्टीलाई सुधार गर्नु नै हो, पार्टीमा कामचलाउने शैलीमा नेता जोगाउने प्रवृति हाबी भयो’ उनले भने, ‘केही व्यक्तिको व्यक्तिगत स्वार्थका कारण कांग्रेस इतिहासमै कमजोर सावित भयो, अब यो कार्यशैली बदल्नु आवश्यक छ।’

सभापति शेरबहादुर देउवाको हातमा आएपछि नेपाली कांग्रेस पार्टी लथालिंगको अवस्थामा पुगेको सिंहको आरोप थियो। ‘पार्टीलाई लथालिंगको अवस्थामा पुग्यो भन्ने कार्यकर्ताको आरोप निर्वाचनमा आएको परिणामबाट नै सिद्ध हुन्छ, अब पनि सच्चिन नसके पार्टी पहिलेको स्थानमा आउने सम्भावना देखिँदैन’ उनले भने।

पूर्व प्रधानमन्त्री सिंहले पार्टीको जारी केन्‍द्रीय समिति बैठकमा आफूले पार्टीभित्रको कमीकमजोरीलाई लिखितरुपमा औल्याएर सभापति देउवालाई बुझाइसकेको जानकारी दिए।

पार्टीको १३ औं महाधिवेशनपछि विधानले निर्देशित गरेका कुरालाई दुईवर्ष पुगिसक्दा पनि सभापतिले कार्यान्वयन गर्न नसकेको आरोप लगाए। ‘अहिलेकै केन्द्रीय समिति बैठकले विधान संशोधन गर्नको लागि एउटा समिति गठन गरेर संशोधित विधानको दस्तावेज महासमितिमा लगेर त्यसलाई वृहतरुपमा छलफल गराएर संशोधन गर्नुपर्छ, उनले भने।

सभापति देउवाकै कार्यशैलीका कारण पार्टी कमजोर अवस्थामा पुगेको उल्लेख गरे। अर्को प्रसंगमा पूर्वमहामन्त्री सिंहले नेपाली जनताले आफै बनाएको संविधानप्रति टिप्पणी गर्ने अधिकार कसैलाई पनि नभएको चेतावनी दिए। युरोपियन युनियन अन्तर्गतको निर्वाचन पर्यवेक्षण मिसनले हालैसम्पन्न प्रतिनिधिसभा र प्रदेशसभाको निर्वाचनबारे दिएको धारणाप्रति उनले आपत्ति जनाए।