नेपालगञ्ज बमकाण्डः अभियुक्त सार्वजनिक, प्रहरीलाई दिए यस्तो बयान

नेपालगञ्ज , ३० कात्तिक।   नेपालगञ्जको पुष्पलाल चोकमा बम राख्ने जाजरकोटका प्रदीप ओलीलाई प्रहरीले सार्वजनिक गरेको छ। भारतको सिमलास्थित रुरुमा काम गर्ने ओली ‘चर्चित’ बन्ने नाममा काम छोडेर ‘हामी नेपाली हाम्रो नेपाल’ नामक संगठनको अध्यक्ष भन्दै हिँडेका थिए। त्यही काम गर्दा ओलीले विष्फोटक पदार्थ राखेर सामान्य बम बनाउन सिकेका थिए। नेपाल आएर उनी कमाण्डो गु्रपको प्रमुख भन्दै हिँड्ने गरेका थिए।

बुधबार मात्रै नेपालगञ्ज आइपुगेका ओलीले नेपालगञ्जको व्यस्त पुष्पलालचोकमा बिहीबार बम राखेका थिए। जसलाई दिनभरि लगाएर नेपाली सेनाले निश्क्रिय पारेको थियो।

‘नेपाल र भारतको सीमामा बम राखेर दुवै देशमा आतंक सिर्जना गर्ने उसको उद्देश्य थियो,’ बाँके प्रहरी प्रमुख एसपी अरुण पौडेलले पत्रकार सम्मेलनमा भने, ‘नाकामा प्रहरी धेरै देखेपछि पक्राउ पर्ने डरले उसले पुष्पलालचोकमा बम राखेको थियो।’

बम राखेपछि ओली ‘सिसी क्यामेरा’मा आफू देखिएकाले बाहिर जाँदा पक्राउ पर्ने डरले घटनास्थल आसपासमै बसेका थिए। प्रहरीले सिसी क्यामेरामा देखिएको हुलियालाई पछ्याउँदै जाँदा बिहीबार नै ओलीलाई पक्राउ गरेको थियो। ओलीका साथबाट प्रहरीले ४१ हजार ५ सय १० रुपैयाँ नेपाली, तीन सय भारतीय रुपैयाँ, विभिन्न नम्बरका सिमकार्ड, हामी नेपाली हाम्रो नेपाल लेखेका २६ र कमाण्डो गु्रप लेखेका २१ थान ब्यानर तथा डेटोनेटर किप ७ थान बरामद गरेको छ।

जाजरकोटको नालगाड–४ निवासी ओलीको अरु कुनै संगठनहरुसँग आवद्धता नदेखिएको एसपी पौडेलले बताए। ‘नेपालमा विकृति विसंगति बढेकाले त्यसको अन्त्य गर्न बम राखेको बयान दिएको छ,’ एसपी पौडेलले भने, ‘यसको संगठनमा अरु मान्छेको संलग्नता पनि देखिँदैन।’ प्लस–२ पास गरेका २७ वर्षीय ओली पाँच वर्षअघि विवाह गरेको र ५ महिनामै श्रीमतीले छोडेर हिँडेपछि बिरक्तिएर भारतमा काम गर्न गएका थिए।

बाँके प्रहरीले उनलाई विष्फोटक पदार्थअन्तर्गत कारबाही प्रक्रिया अघि बढाएको छ। त्यसमा दश वर्ष कैद र एक लाखसम्म जरीवानाको व्यवस्था रहेको छ।