नैतिकताविहीन देउवा सरकारले राजनीतिक अराजकता मच्चायो : महरा

दाङ, २१ माघ । नेकपा माओवादी केन्द्रका वरिष्ठ नेता कृष्णबहादुर महराले देउवा सरकारले देशमा राजनीतिक अराजकता मच्चाएको बताएका छन् ।

रिपोर्टर्स क्लब दाङले दाङको तुलसीपुर एयरपोर्टमा आयोजना गरेको साक्षात्कार कार्यक्रममा बोल्दै दाङ २ बाट निर्वाचित सांसद समेत रहेका महराले हालको सरकार राजनीतिक नैतिकताबिहीन भएको र देउवा सरकारले देशमा राजनीतिक अराजकता मच्चाएको समेत बताए । देउवा सरकारले गरेका कतिपय निर्णयहरुलाई अब बन्ने सरकारले उल्टाउनसम्म सक्ने बताएका छन् ।

रिपोर्टस कल्ब दाङका अध्यक्ष शरद रेग्मीको अध्यक्षता तथा नेता महराको प्रमुख आतिथ्यतामा सम्पन्न भएको बिशेष साक्षात्कार कार्यक्रममा पार्टी एकता कहिले हुन्छ भन्ने पत्रकारहरुको प्रश्नमा दुई दल भनेका फरक दृष्टिकोण र फरक मान्यता बोकेका दल भएकोले पार्टी एकता भन्ने कुरा भनेजस्तो सजिलो नभएको र दुई पार्टीका अध्यक्षबीच व्यापक छलफल समेत भइराखेको बताए । उनले पार्टी एकतामा केही ढिला भएपनि केही समयपछि पार्टी एकता निश्चित हुने बताए ।

नयाँ बन्ने सरकारले टरिगाउँ एयरर्पोटलाई थप बिस्तार गरी ठूलो जहाज सञ्चालनमा ल्याउने र एयरपोर्टमा जहाज उडानलाई नियमित बनाउने समेत उनले पत्रकार सम्मेलनमा बताएका छन । प्रदेश मुकामहरुको अस्थायी केन्द्र तोक्दा धोखा भएको उल्लेख गर्दै अब राजधानी बनाउने जिम्मा प्रदेश सभालाई भएकोमा प्रदेश सभाका सांसदहरुले स्थायी राजधानी तोक्दा न्यायोचित सन्तुलित एंब जिम्मेवारीपूर्वक सुझबुझका साथ निर्णय गर्ने बताए । त्यसपछि प्रदेश नम्वर ५ को स्थायी मुकाम दाङ नै हुने उनले जिकिर गरे ।

दाङ प्रदेश राजधानी बनाउने बिषयमा काँग्रेस नेता खुमबहादुर खड्कासँग समेत छलफल भएको स्वीकार गरेका नेता महराले दाङ प्रदेश राजधानी बनाउने बिषयमा अन्य नेताहरुसँग समेत छलफल भइरहेको बताएका थिए । हाल आफूहरु राष्ट्रियसभाको चुनावमा केन्द्रित भएको बताएका महराले प्रदेश सभाको चुनाबलगत्तै नयाँ सरकार गठनको प्रक्रिया सुरु हुने बताए ।