प्रचण्ड नेतृत्वको सरकारमा जाने रास्वपाको संकेत

काठमाडौँ । राष्ट्रिय स्वतन्त्र पार्टी (रास्वपा) सरकारमा जान सकारात्मक देखिएको छ । तर, सरकारमा जाने वा नजाने भन्ने बिषयमा निर्णय भने शुक्रबार हुने प्रवक्ता मुकुल ढकालले जानकारी दिए ।

उनले आजको बैठकमा सबैले सरकारमा जाँदा र नजाँदाको फाइदा र बेफाइदाबारे छलफल गरेको बताउदै पार्टीको आगामी भविष्यलाई हेरेर निर्णय गर्ने बताए ।

त्यस्तै, रास्वपा केन्द्रीय सदस्य गणेश कार्कीले गृहसहित तीन मन्त्रालय र साझा न्यूनतम कार्यक्रम पुर्नलेखन भए सरकारमा जान सकिने बताएका छन्

सरकारमा विषयमा हतारमा निर्णय गर्न नहुने भन्दै उनले ‘साझा न्यूनतम कार्यक्रममा राखिएका आफ्ना एजेण्डाहरु हटाएको गुनासो गरे । उनले सरकारका विषयमा अझ राम्रोसँग बुझेर र समय लिएर, विश्लेषण गरेर मात्रै निर्णयमा पुग्नुपर्ने सुझाब दिएका छन् । उनले रास्वपालाई दिने भनिएको मन्त्रालयमा समेत हस्तक्षेप भएका भन्दै ती सबै हुने सुनिश्चित भए सरकार जान सकिने बताए ।

सरकार पाँचै वर्ष जाने सुनिश्चित हुनुपर्ने रास्वपाको अडान छ । रास्वपाले हतारिएर सरकारमा जानेभन्दा गठबन्धनको आन्तरिक कुराहरु के के छन् भन्ने विषयलाई राम्रोगरी बुझ्ने नीति लिएको छ । सत्तामा जाने विषयलाई मात्रै प्रधान नबनाउन नेताहरुले समेत सुझाव दिएका छन् ।

आइतबार बसेको केन्द्रीय समिति बैठकमा सभापति रवि लामिछानेसहित केही शीर्ष नेताहरुले परिस्थितिको विश्लेषण गरेका थिए । आफूलाई लागेको विषयमा अरू केन्द्रीय सदस्यले एक एकगरी सुझाव राखेका छन् । सबै केन्द्रीय सदस्यलाई धारणा राख्न दिने भनिएपनि अन्तिममा केही नेताहरुले मात्रै विश्लेषण गरेर सरकारका विषयमा निर्णय गर्न शुक्रबार बैठक सारिएको छ ।