प्रदेश १ मा राजधानी टुंगो लाग्यो, नाम भने जुरेन

प्रदेशसभा गठन भएको १६ महिनापछि प्रदेश १ को राजधानी टुंगो लगाइएको छ । लामो समयपछिको रस्साकस्सीपछि मतदानको सराहा लिंदै प्रदेश राजधानी विराटनगर नै रहने निर्णय गरिएको हो । राजधानी टुंगो लागे पनि प्रदेशको नाम भने प्रदेशसभाले राख्न सकेको छैन । सोमबारको प्रदेशसभा बैठकले यस अघि अस्थायी राजधानी रहेको विराटनगरको पक्षमा परेको प्रस्तावलाई पारित गर्दै स्थायी राजधानी घोषणा गरेको हो । सोमबार दिउँसो २ बजे बोलाइएको प्रदेशसभा बैठक साँझ ६ बजेपछि सुरु भएको थियो । प्रदेशसभाबाट पारित भएको प्रस्तावको भाषाले भविष्यमा जुनसुकै बेला विवाद निम्त्याउन सक्ने सम्भावना भने जीवितै राखेको छ ।

साँझ अवेर सम्पन्न मतदानमा सत्तारुढ नेकपाका प्रमुख सचेतक बुद्धिकुमार राजभण्डारीले दर्ता गराएको विराटनगरको पक्षमा २ तिहाई मत खसेको थियो ।

राजधानी विराटनगरको पक्षमा ८६ मत खसेको थियो । नेकपाको प्रस्तावको विपक्षमा मत खसेन । प्रदेश १ मा १९३ प्रदेश सभा सदस्य रहेका छन् । प्रदेशसभा सदस्यहरु कंग्रेसबाट ज्योति सुब्बा, प्रतापप्रकाश हाङगाम, अगमलाल चौधरी, नेकपाबाट गणेश काङमाङ, संघीय समाजवादी फोरमबाट रामचन्द्र लिम्बू र राधा थापा मतदानमा उपस्थित भएनन् ।

विराट बृहत क्षेत्र अन्तर्गतको विराटनगर, इटहरी र सुन्दरहरैँचामा कार्यालय रहेनछ भन्ने प्रस्ताव पनि दुई तिहाईबाट हुबहु पारित भएको छ । संसदमा दुईतिहाई रहेको नेकपाले दर्ता गराएको प्रस्तावमा ‘प्रदेश १ को राजधानी विराटनगर रहने छ’ भन्ने उल्लेख छ । त्यसको कैफियतमा ‘कार्यपालिका, व्यवस्थापिकालगायतका संरचनाहरु वृहत विराट क्षेत्र अन्तर्गत विराटनगर, इटहरी र सुन्दरहरैंचा आसपासमा रहनेछ’ भन्ने उल्लेख गरेका कारण यसले भविष्यमा जुनसुकै बेला विवाद निम्त्याउन सक्ने सम्भावना छ ।

प्रदेश १ का सामाजिक विकास मन्त्री जीवन घिमिरेले विराटनगर राजधानी बनाउनुपर्छ भन्ने प्रस्ताव सर्वसम्मत रुपमा पारित भएको बताए । ‘राजधानीको टुंगो लागेको छ,’ उनले भने, ‘संरचनाका विषयमा अगामी दिनमा थप गृहकार्य र छलफल गरेर अघि बढ्ने छौं ।’

कांगे्रेस प्रदेशसभा सचेतक सुयर्माराज राईले सत्तारुढ नेकपासग भद्र सहमति भएपछि कांग्रेसले मतदानमा सहभागिता जनाएको बताए ।