प्रधानमन्त्रीको भनाइले धार्मिक सहिष्णुतामा खलल ल्याउन सक्छः जितेन्द्र सोनल

काठमाडौं, असार ३०। भारतले नेपालको भूमि अयोध्यालाई सांस्कृतिक अतिक्रमण गरी आफ्नो भनिरहेको भन्दै प्रधानमन्त्री केपी शर्मा ओलीले दिएको अभिव्यक्ति विवादमा परेको छ ।

सरकारी अधिकारी र विज्ञहरुले समेत प्रधानमन्त्रीको भनाइलाई पुष्टि गर्ने प्रमाण र तथ्य नभएकाले भारतसँगको धार्मिक सम्बन्धमा असर पुर्याउने बताएका छन् ।

अयोध्या भूमि नेपालमै भएको भनिएको प्रदेश २ का भौतिक पुर्वाधारमन्त्री जितेन्द्र सोनलले त प्रधानमन्त्रीको भनाई नेपाल भारतको धार्मिक सहिष्णुतामाथिनै प्रहार गर्ने खालको भएको टिप्पणी गरेका छन् ।

पत्रकार ऋषि धमलासँग कुरागर्दै मन्त्री सोनलले प्रधानमन्त्रीका भनाइहरु कुन उदेश्यले आइरहेका छन् भनेर बुझ्नै नसकिएको बताए ।

उनले प्रधानमन्त्री ओलीका अभिव्यक्ति कहिले विदेशनीति त कहिले क्षेत्रिय सद्भावनै भड्काउने खालका भएको भन्दै नेपालको तराई भूभागका जनता र भारतीय जनतासँगको सम्बन्धमा पटक पटक प्रहार हुदैँ आएको दावी गरे।

सोनलले भने,‘प्रधानमन्त्रीको भनाइमा विश्वास छैन् । अब कुनदिन प्रधानमन्त्रीले नेपाल पनि भारतको खण्ड हो भनेर भन्दिनुहुन्छ । यो धर्म र संस्कृतिको कुरा भएकाले कालान्तरमा ठूलो असर पार्न सक्छ । यो त मानसिक विचलन भयो ।’

मन्त्री सोनलले अहिले प्रदेश २ का अधिकाँस भूभागहरु डुवानमा परेको र यस बारेमा केन्द्रीय सरकारले भारतसँग कुरा गर्नुपर्नेमा उल्टै हस्तक्षेप भयो भनेर गृहमन्त्रीले पनि गैरजिम्मेबार अभिव्यक्ति दिएको बताए ।

सीमा र डुवानका विषयमा प्रदेशले कुरा गर्न नमिल्ने भन्दै उनले केन्द्रीय सरकारका प्रधानमन्त्री र गृहमन्त्रीले भारतसँग कुरा गर्न नसकेको दावीसमेत गरे ।

सधै साउनमा आएर मात्र चासो दिएजस्तो गरेर डुवानको समस्या हल नहुने दावी गर्दै उनले प्रश्न गरे, “अहिलेसम्म गृमन्त्रीले के हेरेर बस्नुभएको थियो? उहाँ कूटनीतिक पहल किन गर्नुहुन्न ? पहल नगर्ने अनि आरोप मात्रै लगाएर हुन्छ ?”