प्रहरीको बर्दीमा दाग लगाउने यी हुन् पुलिस संलग्न भएका चर्चित घटना

काठमाडाै, १७ वैशाख ।  प्रहरीले आफ्नो संगठनको नारा ‘प्रहरी तपाईको साथी’ भन्ने गरे पनि त्यहि प्रहरी कहिलेकाहीं ‘नजाती’ बनेका थेरै उदाहरण हाम्रै अगाडि छन् ।

समाजमा अमन चयन र नागरिकको जिउ धनको सुरक्षाको जिम्मेवारी लिएको प्रहरीले नै बाटो बिराएका घटना धेरै छन् । जसको परिणाम प्रहरी आफै काराबासको सजाय भोग्न वाध्य समेत बनेका छन् । प्रहरीको बर्दीको बद्नाम गर्नेमा तल्लो तहका प्रहरी मात्र नभएर उच्च तहका प्रहरी अधिकारी नै काण्डै काण्डमा मुछिएका मात्र छैनन् । जेल समेत गएका छन् । प्रहरीको आवरणमा छोटो समयमै धेरै धन कमाउने प्रलोभनमा पर्दा आफू मात्र कलंकित भएका छैनन् । सिङ्गो प्रहरी संगठनलाई नै बदनाम बनाएका छन् । नेपाल प्रहरीका उच्च अधिकारीहरु नै संलग्न भएका केहि काण्ड यस प्रकार छन् ।

सुडान घोटाला स् नेपाल प्रहरीमा सबैभन्दा चर्चित काण्ड सुडान घोटाला हो । सुडान घोटालामा ३ जना पूर्व आइजीपी जेल गईसकेका छन् । सर्वोच्च अदालतले नेपाल प्रहरीको बन्दोबस्ती सामान खरिद प्रकरणमा अनियमितता पुष्टि गर्दै नेपाल प्रहरीका तीन पूर्व प्रमुखहरूलाई दोषी ठहर गरेको हो । सर्वोच्चले पूर्व प्रहरी महानिरीक्षकहरू ओमविक्रम राणा, हेमबहादुर गुरुङ र रमेशचन्द ठकुरीलाई भ्रष्टाचारी ठहर गरेको हो । राणालाई दुई वर्ष कैद र ५० हजार रुपैयाँ जरिबाना हुने सजाय सुनाइएको छ भने गुरुङ र ठकुरीलाई एक वर्ष कैद र जनही ४० हजार रुपैयाँ जरिबानाको फैसला गरेको थियो । नेपाल प्रहरीको इतिहासमा एकै घटनामा ३ जना पूर्वआइजीपी जेल चलान भएको यो पहिलो घटना हो ।

दरबारमार्ग बलात्कार प्रकरण स् २०७४ माघ ७ मा राजधानीको दरबारमार्गस्थित होटल ल्याण्डमार्कमा भएको बलात्कार प्रकरणले प्रहरीले रकम लिएर घटना मिलाएको विषय पनि प्रहरी संगठनभित्रको धब्बा हो । होटलमा कैलालीकी एक २० वर्षीय चौधरी थरकी युवतीको सामुहिक बलात्कारका दोषीलाई पैसामा मिलाएर उन्मुक्ति दिन खोजीएको भन्दै दरबारमार्गका सई चन्द्र भण्डारी र इन्पेसक्टर लक्ष्मणसिंह ठकुरी निलम्बनमा परे ।

उक्त घटनामा पीडित महिला आफैले मुद्दा फिर्ता लिन खोज्दा विवाद भएको थियो । तर बलात्कारको मुद्दा परेपछि सो मुद्दा फिर्ता लिन नपाउने भएको थियो । तत्कालीन आईजीपी प्रकाश अर्यालले दोषीलाई कडा कारबाही गर्न मातहतका निकायलाई निर्देशन दिएका थिए । उनले सार्वजनिक रुपमै यस्तो घटनाको मुद्दा फिर्ता नहुने बताएर प्रशंसा बटुलेका थिए ।

३५ किलो सुनकाण्ड स् नेपाल प्रहरीका उच्च अधिकारी अनुसन्धानमा तानिएको अर्को चर्चित काण्ड हो ३५ किलो सुन । २०७१ मा तत्कालीन डीआईजी प्रकाश अर्याल केन्द्रीय अनुसन्धान व्युरो (सीआइबी) का प्रमुख थिए । सीआइबीको टोलीले चीनको खासाबाट नेपाल भित्रिएको ३५ किलो सुन समात्यो । तर प्रहरी अधिकारीले सुन तस्करीको सूचना दिने नक्कली सूचनादाता बनाएर कमीसन दाबी गरे । तत्कालीन डीआईजी अर्यालसँग अख्तियारले बयान समेत लिएको थियो ।

राज्य व्यवस्था समितिले त्यसबेला निलम्वन गर्ने तयारी गरेपनि अन्ततः उनले त्यस काण्डबाट सफाई पाएका थिए । नेपाल प्रहरीभित्र त्यो घटनालाई ३५ किलो प्रकरण भनेर चिनिन्छ । नियमअनुसार कुनैपनि भन्सार नाकाबाट राजश्व छली तस्करी भईरहेको कुनै वस्तु वा सामानका विषयमा सूचना दिने सुराकीलाई उसको नाम गोप्य राखेर सरकारले १५ प्रतिशत कमिशन दिने व्यवस्था थियो । नक्कली सुराकी खडा गरेको सम्बन्धमा वास्तविक सुराकी आफैँ उपस्थित भएपछि यो रहस्य बाहिरिएको थियो।

३३ किलो सुन र सनम हत्या प्रकरण स् नेपालमा सुन तस्करीको इतिहामै सबैभन्दा बढी व्यक्ति पक्राउ र हत्यासम्मको आपराधिक रुप लिएको घटना गत ७ माघमा त्रिभुवन अन्तराष्ट्रिय विमानस्थलबाट भित्रिएको भनिएको ३३ किलो सुनको हो । युएई हुँदै नेपाल आएको भनिएको ३३ किलो सुन हराएको र सुन भित्र्याउन सम्मिलित भएका सनम शाक्यको हत्यापछि यो घटना निकै जेलिँदै गएको छ । त्यस हत्यामा संलग्न भनिएका सुन तस्करीका मुख्य नाईके चुडामणी उप्रेती फरार छन् ।

तर यहि घटनामा जोडेर त्रिभुवन अन्तर्रा्ष्ट्रिय विमानस्थलभित्र कार्यरत लोडर प्रेम नारायण चौधरीले प्रहरी हिरासतमै आत्महत्या गरेका छन् । यो प्रकरणमा २७ जना पक्राउ पर्दा पूर्व डीआइजी गोविन्द निरौला, बहालवाला एसपी विकासराज खनाल र डिएसपी संजय राउत र प्रजित केसी प्रहरी हिरासतमा छन् । उनीहरु तीनै जनालई संगठित अपराध र ज्यान मार्ने उद्योगमा मुद्दा दर्ता गरेर अनुसन्धान अगाडी बढाइएको छ । यो प्रकरणमा केही पूर्व आइजीपी तथा एक बहालवाला एसएसपीको नाम पनि मुछिएको छ ।

(Adipex)